நுவரெலியா - கிரகரி வாவியில் ஆபத்தான நீர் மாசுபாடு: சுற்றுலாப் பயணிகளுக்கு அவசர எச்சரிக்கை!

சுற்றுலாப் பயணிகளின் சொர்க்கபுரியான நுவரெலியா கிரகரி வாவியின் நீரை நேரடியாக அருந்த வேண்டாம் என்றும், அவ்வாறு அருந்தினால் உயிருக்கே ஆபத்து ஏற்படக்கூடும் என்றும் மத்திய சுற்றாடல் அதிகார சபை எச்சரிக்கை விடுத்துள்ளது.

நுவரெலியாவில் அமைந்துள்ள புகழ்பெற்ற கிரகரி வாவிப் பகுதியில் நிலவும் நீர் மாசுபாடு தொடர்பில் மத்திய சுற்றாடல் அதிகார சபை கவலை வெளியி்ட்டுள்ளது.

நகரப் பகுதியிலிருந்து வெளியேறும் கழிவுநீர் மற்றும் சுற்றியுள்ள விவசாய நிலங்களில் பயன்படுத்தப்படும் இரசாயனங்கள் வாவியில் கலப்பதே இந்த நீர் மாசுபாட்டிற்கு முக்கியக் காரணம் எனக் சுட்டிக்காட்டப்பட்டுள்ளது. 

இதனால் வாவியில் உள்ள நீர் நச்சுத்தன்மை அடைந்துள்ளதாகவும், சுத்திகரிக்கப்படாமல் இந்நீரை நேரடியாக அருந்தினால் தீவிர சுகாதாரச் சிக்கல்கள் மற்றும் உயிராபத்து கூட ஏற்படலாம் என சுற்றாடல் அதிகாரிகள் எச்சரித்துள்ளனர்.

எனவே, நுவரெலியாவிற்கு வருகை தரும் சுற்றுலாப் பயணிகளும் உள்ளூர் மக்களும் கிரகரி வாவியின் நீரை எந்தவொரு தேவைக்கும் நேரடியாக அருந்துவதைத் தவிர்க்குமாறு கேட்டுக்கொள்ளப் பட்டுள்ளனர். 

மேலும், வாவியைச் சுத்திகரிப்பதற்கும் மாசடைவதைத் தடுப்பதற்கும் அவசர நடவடிக்கைகளை மேற்கொள்ளுமாறு சம்பந்தப்பட்ட அதிகாரிகளுக்குச் சுற்றாடல் அதிகார சபை அறிவுறுத்தியுள்ளது.