பதிவு செய்யப்படாத மோட்டார் சைக்கிள்களுக்கு அபராதம் விதிக்கப்படும்: திணைக்களம் அதிரடி அறிவிப்பு!

அனைத்து வகையான மோட்டார் சைக்கிள்கள் உட்பட அனைத்து வாகனங்களையும் கட்டாயமாகப் பதிவு செய்ய வேண்டும் என மோட்டார் போக்குவரத்து திணைக்கள ஆணையாளர் நாயகம் தெரிவித்துள்ளார்.

48 குதிரை வலு கொண்ட மோட்டார் சைக்கிள்களைப் பதிவு செய்யத் தேவையில்லை எனச் சில மோட்டார் சைக்கிள் விற்பனையாளர்கள் வாடிக்கையாளர்களிடம் கூறி வருவது தங்கள் கவனத்திற்கு வந்துள்ளதாகத் திணைக்களம் குறிப்பிட்டுள்ளது. இத்தகவல் முற்றிலும் தவறானது எனத் தெரிவிக்கப்பட்டுள்ளது.

பொது வீதிகளில் பதிவு செய்யப்படாத வாகனங்களைச் செலுத்திச் செல்லும்போது, அதன் சாரதிகளுக்கு எதிராகக் காவல்துறையினரால் அபராதம் விதிக்கப்படலாம் என எச்சரிக்கப்பட்டுள்ளது.

சட்டப்படி அனைத்து வாகனங்களையும் பதிவு செய்வது கட்டாயமாகும் என்பதால், பொதுமக்கள் விற்பனையாளர்களின் தவறான தகவல்களை நம்பிப் பதிவு செய்யாமல் வாகனங்களை வீதிகளில் செலுத்த வேண்டாம் என மோட்டார் போக்குவரத்து திணைக்கள ஆணையாளர் நாயகம் வலியுறுத்தியுள்ளார்.