இலங்கையில் மழைத் தாக்கம் படிப்படியாக குறையும்-முல்லைத்தீவில் 35.7 டிகிரி செல்சியஸ் பதிவு!

இன்று (25) காலை வெளியிடப்பட்ட வானிலை முன்னறிவிப்பின்படி, நிலப்பரப்பிற்குள் நுழைந்துள்ள இந்த அமைப்பின் காரணமாக, இலங்கையின் வானிலை நிலவரங்களில் ஏற்பட்டுள்ள தாக்கம் இன்றில் இருந்து படிப்படியாகக் குறையும் என எதிர்பார்க்கப்படுகிறது.

அமைப்பின் தாக்கம் குறைந்தாலும், மேற்கு, சபரகமுவ, தெற்கு, மத்திய மற்றும் வடமேற்கு மாகாணங்களில் அவ்வப்போது மழை அல்லது இடியுடன் கூடிய மழை பெய்யக்கூடும். இதில் சில இடங்களில் 75 மி.மீ. க்கும் அதிகமான அளவு கணிசமான மழை பதிவாக வாய்ப்புள்ளதாகக் குறிப்பிடப்பட்டுள்ளது.

மத்திய மலைநாட்டின் மேற்குச் சரிவுப் பகுதிகள், வடமத்திய மற்றும் வடமேற்கு மாகாணங்கள், அத்துடன் திருகோணமலை, அம்பாந்தோட்டை, மாத்தளை ஆகிய மாவட்டங்களில் மணிக்கு 30 முதல் 40 கி.மீ. வேகத்தில் மிதமான பலத்த காற்று வீசக்கூடும் என எச்சரிக்கப்பட்டுள்ளது.

இடியுடன் கூடிய மழை பெய்யும் வேளைகளில் தற்காலிகமாக வீசக்கூடிய பலத்த காற்று மற்றும் மின்னல் அபாயங்களில் இருந்து பொதுமக்கள் தங்களைப் பாதுகாத்துக் கொள்ள தேவையான முன்னெச்சரிக்கை நடவடிக்கைகளை எடுக்குமாறு கேட்டுக்கொள்ளப்படுகிறார்கள்.

இதேவேளை, நாட்டின் நேற்றைய தினத்திற்கான அதிகபட்ச வெப்பநிலையாக 35.7 டிகிரி செல்சியஸ் முல்லைத்தீவு வளிமண்டலவியல் நிலையத்தில் பதிவாகியுள்ளதாகத் திணைக்களம் மேலும் தெரிவித்துள்ளது.