ராஜபக்ச குடும்பம்: இலங்கை ஜனாதிபதி அனுர குமார பரபரப்பு கருத்து

பொலன்னறுவையில் நடைபெற்ற தேசிய மக்கள் சக்தியின் விவசாயிகள் பேரணியில் பேசிய அவர், குடும்ப உறவுகளைப் பொருட்படுத்தாமல் சட்டம் அனைவருக்கும் சமமாக பொருந்தும் என்றும், பொதுப் பணத்தை திருடிய எவருக்கும் அனுதாபம் காட்டப் போவதில்லை என்றும் தெரிவித்தார்.

அனுராதபுரத்தில் நடைபெறும் பேரணியில் ஊழல் குற்றச்சாட்டுகளுக்கு உள்ளான பலர் பங்கேற்றுள்ளதாகக் குறிப்பிட்ட ஜனாதிபதி, குற்றப் புலனாய்வுத் துறையினர் அங்கு சென்றால் அவர்களை ஒரே இடத்தில் கைது செய்ய முடியும் என்றும் விமர்சித்தார்.

இந்தப் பேரணி பொதுநலனுக்காக நடத்தப்படவில்லை என்றும், குற்றச்சாட்டுகளை எதிர்கொள்ளும் நபர்கள் சட்ட நடவடிக்கைகளில் இருந்து தங்களைப் பாதுகாத்துக்கொள்ளும் முயற்சி என்றும் அவர் குற்றம் சாட்டினார்.

முன்னாள் ஜனாதிபதி மஹிந்த ராஜபக்ச உள்ளிட்ட முக்கிய அரசியல் பிரமுகர்கள் பங்கேற்ற இந்தப் பேரணி நடைபெற்றுவரும் நிலையில், ஸ்ரீலங்கன் ஏர்லைன்ஸ் விமானக் கொள்முதல் தொடர்பான விசாரணையில் கைது செய்யப்பட்ட நாமல் ராஜபக்ச விளக்கமறியலில் வைக்கப்பட்டுள்ளதும் குறிப்பிடத்தக்கது.