முன்னோர்களின் ஆசி பெற உகந்த மகாளய பட்சம்: வழிபாட்டு முறைகளும் பலன்களும்!

இந்து தர்மத்தில் முன்னோர்களை வழிபடுவதற்கும் அவர்களின் ஆசீர்வாதத்தைப் பெறுவதற்கும் மிகவும் புனிதமான காலமாகப் போற்றப்படுவது 'மகாளய பட்சம்' ஆகும். புரட்டாசி மாதத்தில் வரும் அமாவாசைக்கு முந்தைய 15 நாட்கள் (தேய்பிறை காலம்) 'மகாளய பட்ச காலம்' என்று அழைக்கப்படுகிறது.

'பட்சம்' என்றால் 15 நாட்கள் என்று பொருள். இந்த 15 நாட்களிலும் மறைந்த நம் முன்னோர்கள் (பித்ருக்கள்) பூமிக்கு வருகை தந்து தம் சந்ததியினரைக் காண்பதாகவும், அவர்களின் வழிபாட்டையும் தர்பணத்தையும் ஏற்று ஆசீர்வதிப்பதாகவும் ஆன்மீக நூல்கள் கூறுகின்றன.

வழக்கமாகக் ஒவ்வொரு மாதமும் வரும் அமாவாசையன்று தர்ப்பணம் கொடுக்க இயலாதவர்கள், இந்த 15 நாட்களில் ஏதேனும் ஒரு நாளிலோ அல்லது 'மகாளய அமாவாசை' அன்றோ திதி/தர்ப்பணம் கொடுத்தால், ஆண்டு முழுவதும் கொடுத்த பலன் கிடைக்கும் என்பது நம்பிக்கை.

இந்த 15 நாட்களில் ஒவ்வொரு திதிக்கும் ஒரு தனித்துவமான சிறப்பு உண்டு

பிரதமை: பண வரவு அதிகரிக்கும், கடன் தொல்லைகள் தீரும்.

த்விதியை: நல்ல சந்ததி (குழந்தைப் பாக்கியம்) அமையும்.

த்ரிதியை: ஆரோக்கியம் மேம்படும், நோய்கள் அகலும்.

சதுர்த்தி: எதிரிகளின் தொல்லைகள் மற்றும் தடைகள் விலகும்.

பஞ்சமி: செல்வம், சொத்து மற்றும் ஆபரணச் சேர்க்கை உண்டாகும்.

ஷஷ்டி: புகழ் மற்றும் சமூகத்தில் நல்ல மதிப்பும் மரியாதையும் கிடைக்கும்.

சப்தமி: தெய்வங்களின் அருள் மற்றும் உயர் பதவிகள் கிடைக்கும்.

அஷ்டமி (மத்தியாஷ்டமி): நல்ல புத்தி கூர்மை மற்றும் மன அமைதி கிடைக்கும்.

நவமி : கணவருக்கு முன் மறைந்த சுமங்கலிப் பெண்களுக்குத் தர்ப்பணம் செய்ய உகந்த நாள். குடும்பத்தில் மங்கள காரியங்கள் தடைகளின்றி நடக்கும்.

தசமி: நீண்ட நாள் விருப்பங்கள் நிறைவேறும், தொழில் வளர்ச்சி அடையும்.

ஏகாதசி: கல்வி, அறிவு மற்றும் ஆன்மீக வளர்ச்சி கூடும்.

துவாதசி: ஆயுள் பலம் மற்றும் குடும்பத்தில் நிம்மதி நிலவும்.

த்ரயோதசி: பசுக்கள் மற்றும் விலங்குகளுக்கு உணவளித்தால் பித்ருக்களின் முழு ஆசி கிடைக்கும்.

சதுர்த்தசி (சஸ்திர ஹத திதி): விபத்துக்கள் அல்லது ஆயுதங்களால் எதிர்பாராத விதமாக இறந்தவர்களுக்குத் தர்ப்பணம் செய்ய வேண்டிய நாள்.

மகாளய அமாவாசை: மகாளய பட்சத்தின் உச்சக்கட்ட நாள். அனைத்து முன்னோர்களுக்கும் தில தர்ப்பணம் செய்ய வேண்டிய மிக முக்கியமான புண்ணிய தினம்.

வருடாந்திர திதி கொடுக்கத் தவறியவர்கள், பெற்றோர் மட்டுமின்றி தாத்தா-பாட்டி, உறவினர்கள் மற்றும் தமக்கு உதவி செய்த மறைந்த முன்னோர்கள் அனைவருக்கும் இந்த காலத்தில் வழிபாடு செய்ய முடியும்.

மகாளய பட்ச காலத்தில் அன்னதானம், ஆடை தானம், மற்றும் எள் தானம் செய்வது மிகவும் விசேஷமானது. இதனால் முன்னோர்களின் ஆன்மா சாந்தியடைந்து, குடும்பத்தில் சந்ததி விருத்தி, ஆரோக்கியம் மற்றும் செல்வம் பெருகும்.

நதிக்கரைகள், கடற்கரைகள், புண்ணிய தீர்த்தங்கள் அல்லது வீட்டிலேயே சுபகாரியங்களைத் தவிர்த்து முன்னோர்களுக்கு எள்ளும் தண்ணீரும் இறைத்துத் தர்ப்பணம் கொடுக்க வேண்டும்.

அன்னதானம் வழங்கல்: காக்கைகளுக்கும், ஏழை எளியவர்களுக்கும் மற்றும் பசுக்களுக்கும் உணவளிப்பது பித்ருக்களின் ஆசியைப் பெற்றுத் தரும்.

 மகாளய பட்சத்தின் 15 நாட்களும் வீட்டில் சுப நிகழ்ச்சிகள் (திருமணம், கிரகப்பிரவேசம் போன்றவை) நடத்துவதையும், புதிய பொருட்கள்/ஆடைகள் வாங்குவதையும் தவிர்ப்பது வழக்கமாகும்.

மகாளய பட்சத்தின் இறுதி நாளான மகாளய அமாவாசை மிகவும் சக்திவாய்ந்த நாளாகக் கருதப்படுகிறது. இந்நாளில் பல ஆலயங்கள் மற்றும் ஆற்றங்கரைகளில் ஆயிரக்கணக்கான பக்தர்கள் திரண்டு தங்கள் முன்னோர்களுக்குத் தர்ப்பணம் கொடுத்து வழிபாடு செய்வர்.