ரூ. 81 இலட்சம் இலஞ்சம் பெற்ற குற்றச்சாட்டு: முன்னாள் அமைச்சரின் பிரத்தியேக செயலாளர் மீண்டும் விளக்கமறியலில்!

இலஞ்ச ஊழல் ஆணைக்குழுவின் அதிகாரிகள் மற்றும் சந்தேகநபர் சார்பில் ஆஜரான சட்டத்தரணிகள் முன்வைத்த வாதங்களை ஆராய்ந்த கொழும்பு மேலதிக நீதிவான் அசங்க எஸ். போதரகம இந்த உத்தரவைப் பிறப்பித்துள்ளார்.

வழக்கு விசாரணையின் போது நீதிமன்றில் கருத்து தெரிவித்த இலஞ்ச ஊழல் ஆணைக்குழுவின் அதிகாரிகள், முறைசாரா நடைமுறைகளைப் பின்பற்றித் தேர்ந்தெடுக்கப்பட்ட மூன்று நிறுவனங்களுக்கு மட்டுமே பொஸ்பேட் ஏற்றுமதி செய்வதற்குத் தேவையான ஏற்பாடுகளைச் செய்ய சந்தேகநபர் நடவடிக்கை எடுத்துள்ளதாகக் குறிப்பிட்டனர்.

குறித்த நிறுவனங்களுக்குப் பொஸ்பேட் ஏற்றுமதி செய்வதற்கான உரிமங்களைப் பெற்றுக்கொடுக்க ஆதரவளித்தமை மற்றும் உதவி செய்தமைக்காக, இலஞ்சமாக 81 இலட்சம் ரூபாயைக் கோரிப் பெற்று, அதைத் தனது சொந்த வங்கிச் கணக்கில் வைப்பு செய்துள்ளமை விசாரணைகளில் தெரியவந்துள்ளதாக அதிகாரிகள் சுட்டிக்காட்டினர்.

இச்சம்பவம் தொடர்பான விசாரணைகள் தொடர்வதாகவும், இது தொடர்பில் மேலும் 7 சந்தேகநபர்கள் கைது செய்யப்படவுள்ளதாகவும் இலஞ்ச ஊழல் விசாரணை ஆணைக்குழு நீதிமன்றத்திற்குத் தெரிவித்தது.

முன்வைக்கப்பட்ட அனைத்துக் கோரிக்கைகளையும் பரிசீலித்த மேலதிக நீதிவான், சந்தேகநபரின் விளக்கமறியல் காலத்தை நீடித்து உத்தரவிட்டார்.