ஆந்திராவில் அதிர்ச்சி: ஸ்ரீசைலம் கோயில் விடுதியில் ஒரே குடும்பத்தைச் சேர்ந்த 5 பேர் தற்கொலை

ஆந்திர மாநிலம் ஸ்ரீசைலம் புண்ணியத் தலத்தில் பெரும் சோகத்தை ஏற்படுத்திய அதிர்ச்சிச் சம்பவம் ஒன்று வெளிச்சத்திற்கு வந்துள்ளது. கோயில் பகுதியில் உள்ள ஒரு தனியார் தங்கும் விடுதியில் ஒரே குடும்பத்தைச் சேர்ந்த ஐந்து பேர் தற்கொலை செய்து கொண்ட சம்பவம் அப்பகுதியில் பெரும் அதிர்ச்சியை ஏற்படுத்தியுள்ளது.  

ஸ்ரீசத்ய சாய் மாவட்டத்தைச் சேர்ந்த சுதாகர், அவரது மூன்று சகோதரிகள் மற்றும் 15 வயது மருமகன் ஆகியோர் ஜூலை 28 அன்று ஸ்ரீசைலம் வந்து இந்த விடுதியில் அறை எடுத்து தங்கியுள்ளனர். இரு நாட்களாக அறை கதவு திறக்கப்படாத நிலையில், அங்கு துர்நாற்றம் வீசியதை அடுத்து ஊழியர்கள் ஜன்னல் வழியாகப் பார்த்தபோது, அனைவரும் தூக்கில் தொங்கிய நிலையில் சடலமாகக் கண்டெடுக்கப்பட்டனர். 

 கடுமையான கடன்பிரச்சனை, குடும்ப வறுமை மற்றும் நீண்டகால உடல்நலக்குறைவு காரணமாக இவர்கள் இந்த தீவிர முடிவை எடுத்திருக்கலாம் என காவல்துறையின் முதற்கட்ட விசாரணையில் தெரியவந்துள்ளது. இச்சம்பவம் குறித்து வழக்குப்பதிவு செய்துள்ள போலீசார் மேலும் தீவிர விசாரணை நடத்தி வருகின்றனர்.