'சிக்மா' ஒரு சாதாரண படமல்ல... என் வாழ்க்கைப் பயணம்! - மனம் திறந்த இயக்குநர் ஜேசன் சஞ்சய்!

தமிழ் திரையுலகின் முன்னணிப் பிரபலங்களின் வாரிசுகள் நடிகர்களாகக் களம் இறங்கும் சூழலில், திரைக்கதை மற்றும் இயக்கத்தில் ஆர்வம் காட்டி முதல் படத்திலேயே அனைவரின் கவனத்தையும் ஈர்த்துள்ளார் ஜேசன் சஞ்சய். சர்வதேச அளவில் திரைப்படப் படிப்பை முடித்துவிட்டு வந்த இவர், தனது கன்னி முயற்சியாக ஒரு விறுவிறுப்பான ஆக்ஷன் த்ரில்லர் கதையைக் கையில் எடுத்துள்ளார்.

'சிக்மா' படத்தின் படப்பிடிப்பு மற்றும் உருவாக்கப் பணிகள் குறித்து ஜேசன் சஞ்சய் பதிவிட்டுள்ளதாவது

"இந்தத் திரைப்படம் வெறும் ஒரு கலைப்படைப்பு மட்டுமல்ல; எனது கனவு, நம்பிக்கை, அசைக்க முடியாத கடின உழைப்பு மற்றும் விடாமுயற்சி நிறைந்த ஒரு நீண்ட பயணம். எனக்கு இந்த வாய்ப்பை வழங்கிய தயாரிப்பு நிறுவனத்திற்கும், என் தொலைநோக்குப் பார்வைக்கு உயிர் கொடுத்த அனைத்து தொழில்நுட்பக் கலைஞர்களுக்கும், நடிகர்களுக்கும் எனது மனமார்ந்த நன்றிகள்."என ஜேசன் சஞ்சய் பதிவிட்டுள்ளார் .

இப்படத்தில் சுந்தீப் கிஷனுடன் இணைந்து முன்னணி நட்சத்திரங்கள் பலரும் நடித்துள்ளனர். இப்படத்தின் முதல் பார்வை மற்றும் மேக்கிங் வீடியோக்கள் ஏற்கனவே சமூக வலைத்தளங்களில் வெளியாகி ரசிகர்களிடையே பெரும் வரவேற்பைப் பெற்றுள்ளன.

புதுமையான கோணத்தில் உருவாக்கப்பட்டு வரும் 'சிக்மா' திரைப்படம், இளம் தலைமுறை ரசிகர்களைக் கவரும் வகையில் இருக்கும் என எதிர்பார்க்கப்படுகிறது. இப்படத்தின் அடுத்தடுத்த அறிவிப்புகள் விரைவில் வெளியாகும் எனப் படக்குழுவினர் தெரிவித்துள்ளனர்.