யாழ்ப்பாணம் செம்மணி புதைகுழியில் இதுவரை 582 மனித எலும்புக்கூடுகள் கண்டெடுப்பு.

இலங்கையின் யாழ்ப்பாணம் செம்மணி பகுதியில் நடத்தப்பட்ட அகழ்வாராய்ச்சியில் இதுவரை 582 மனித எலும்புக்கூடுகள் கண்டெடுக்கப்பட்டுள்ள சம்பவம் அதிர்ச்சியை ஏற்படுத்தியுள்ளது.

உள்நாட்டுப் போரின்போது ராணுவக் கட்டுப்பாட்டில் இருந்த செம்மணி பகுதியில் தமிழ் மக்கள் கொன்று புதைக்கப்பட்டதாக நீண்டகாலமாக குற்றச்சாட்டுகள் இருந்து வந்த நிலையில், கட்டுமானப் பணிகளின்போது எலும்புகள் கண்டெடுக்கப்பட்டதைத் தொடர்ந்து நீதிமன்ற உத்தரவின்பேரில் அகழ்வாராய்ச்சி தொடங்கப்பட்டது.

இதுவரை கண்டெடுக்கப்பட்ட எலும்புக்கூடுகளில் பல குழந்தைகள் மற்றும் சிறுவர்களுடையவை எனத் தெரிவிக்கப்பட்டுள்ளது. மேலும், புதைகுழியில் இருந்து குழந்தைகளின் விளையாட்டுப் பொருட்கள், பால் பாட்டில்கள், பள்ளிப் பைகள் மற்றும் வளையல்கள் போன்ற பொருட்களும் மீட்கப்பட்டுள்ளன.

ஒரு எலும்புக்கூடு கைகள் நெஞ்சோடு சேர்த்து கயிற்றால் கட்டப்பட்ட நிலையில் கண்டெடுக்கப்பட்டதாகவும் தகவல்கள் தெரிவிக்கின்றன.

1995-ஆம் ஆண்டு காணாமல் ஆக்கப்பட்ட தமிழ் மக்களின் உடல்களாக இவை இருக்கலாம் என மனித உரிமை அமைப்புகள் குற்றம்சாட்டியுள்ளன.