"சமூக வலைத்தள அவதூறுகள் பண்பட்ட சமூகத்திற்கு அழகல்ல": பிரதமர் ஹரிணி சாடல்!

சமூக ஊடகங்களில் சிறுவர்கள், பெண்கள் மற்றும் ஏனையோரை இலக்குவைத்து மேற்கொள்ளப்படும் தரக்குறைவான விமர்சனங்கள் குறித்துப் பிரதமர் கலாநிதி ஹரிணி அமரசூரிய தனது பலத்த கவலையைத் தெரிவித்துள்ளார். இவ்வாறான செயற்பாடுகள் சமூகத்தில் நற்பண்பும், உணர்வுப்பூர்வமான மனப்பக்கமும் கொண்ட பிரஜைகளின் அவசியத்தை உணர்த்துவதாக அவர் சுட்டிக்காட்டியுள்ளார்.

கம்பஹா மாநகர சபை மண்டபத்தில் நடைபெற்ற 'கம்பஹா இலக்கிய விழா' (GAMLIT 26) நிகழ்வில் முதன்மை விருந்தினராகக் கலந்துகொண்டு உரையாற்றுகையிலேயே பிரதமர் இதனைத் தெரிவித்தார்.

இக்கூட்டத்தில் பிரதமர் மேலும் உரையாற்றுகையில்:

வெறும் புத்தக அறிவை மட்டும் வைத்துள்ள ஒருவர் பண்பட்ட மனிதராக முடியாது. கலை, இலக்கியங்கள் மூலமே ஒருவருக்குள் இரக்க குணமும், மனிதநேயமும் பிறக்கின்றன.

சமூக வலைத்தளங்களில் மற்றவர்களைக் கேலி செய்வதோ, மனதளவில் காயப்படுத்துவதோ அல்லது அவமதிப்பதோ பண்பட்ட மனிதரின் அடையாளமாகாது.

நாட்டின் பொருளாதாரத்தை கட்டியெழுப்புதல், உட்கட்டமைப்புகளை மேம்படுத்துதல் போன்ற பணிகளுக்கு இணையாக, சமூகத்தை நேர்மறையாக மாற்றியமைக்கக்கூடிய பண்புள்ள மனிதர்களை உருவாக்குவதும் அரசின் முக்கிய பொறுப்பாகும்.

மாணவர்களின் தனித்துவமான திறமைகளை அடையாளம் கண்டு, அவர்களைச் சரியான பாதையில் வழிநடத்த வேண்டியது அவசியம். கலை மற்றும் இலக்கியங்களை மாணவர்கள் தங்கள் வாழ்க்கையின் ஒரு பகுதியாக மாற்றிக்கொள்ள வேண்டும்.

நாட்டின் எதிர்காலச் சந்ததியினரை போலிச் செய்திகள், வெறுப்புப் பேச்சுகள் மற்றும் சமூக ஊடகத் தவறுகளிலிருந்து பாதுகாக்கவும், பண்பட்ட பிரஜைகளை உருவாக்கவும் இவ்வாறான கலை-இலக்கிய விழாக்கள் தேசிய அளவில் விரிவுபடுத்தப்பட வேண்டும் என்றும் பிரதமர் வலியுறுத்தினார்.