பொருளாதார மீட்சியில் இலங்கை: 4.2% வளர்ச்சி பெறுகிறது பொருளாதாரம் – நாணய நிதியத்துடன் முக்கிய உடன்பாடு!

இந்த உடன்பாட்டிற்கு சர்வதேச நாணய நிதியத்தின் நிறைவேற்று சபை இறுதி ஒப்புதல் அளித்த பின்னர், இலங்கைக்கு சுமார் 345 மில்லியன் அமெரிக்க டொலர்கள் கிடைக்கப்பெறும்.

 இதன் மூலம் இந்த திட்டத்தின் கீழ் இலங்கைக்கு கிடைத்த மொத்த நிதியுதவி சுமார் 2.7 பில்லியன் டொலர்களாக உயர்வடையும்.இருப்பினும், நிறைவேற்று சபையின் ஒப்புதலுக்கு முன்னர், 2027ஆம் ஆண்டிற்கான வரவு செலவுத் திட்டத்தை பாராளுமன்றத்தில் சமர்ப்பித்தல் மற்றும் நிதி உத்தரவாத மதிப்பாய்வை பூர்த்தி செய்தல் ஆகிய நிபந்தனைகள் விதிக்கப்பட்டுள்ளன.

பொருளாதார அதிர்ச்சிகளுக்கு மத்தியிலும் இலங்கை கணிசமான மீள்தன்மையைக் காட்டியுள்ளதாக சுட்டிக்காட்டியுள்ள சர்வதேச நாணய நிதியம், 2026ஆம் ஆண்டின் இரண்டாம் காலாண்டில் இலங்கை பொருளாதாரம் 4.2 சதவீத வளர்ச்சியடைந்துள்ளதாகவும், ஓகஸ்ட் மாத முடிவில் வெளிநாட்டு கையிருப்பு 6.9 பில்லியன் டொலர்களாக அதிகரித்துள்ளதாகவும் தெரிவித்துள்ளது.

அதேவேளை, மத்திய கிழக்கு மோதல்கள், உலகளாவிய வர்த்தக மாற்றங்கள் மற்றும் காலநிலைத் தாக்கங்கள் காரணமாக ஆபத்துகள் தொடர்வதால், எரிபொருள் விலைச் சீரமைப்பு, ஏழைகளுக்கான நிவாரணங்கள் மற்றும் ஊழல் எதிர்ப்புச் சட்டங்களைப் பாதுகாத்தல் உள்ளிட்ட பல முக்கிய பரிந்துரைகளையும் நாணய நிதியம் முன்வைத்துள்ளது.