தேனி சிறை கைதிகள் விவகாரம்: மருத்துவ ஆய்வு செய்ய சென்னை உயர் நீதிமன்றம் உத்தரவு!

தேனி சிறையிலிருந்து தப்பித்து மீண்டும் கைது செய்யப்பட்ட கைதிகள் துன்புறுத்தப்பட்டதாக எழுந்த குற்றச்சாட்டுகளை அடுத்து, அவர்களுக்கு உரிய மருத்துவச் சிகிச்சை வழங்கிடக் கோரி சென்னை உயர் நீதிமன்றத்தில் மனுத் தாக்கல் செய்யப்பட்டது.

இம்மனு நீதிபதிகள் ஜெகதீஷ் சந்திரா மற்றும் பி. கார்த்திகேயன் ஆகியோர் அடங்கிய அமர்வு முன்பாக இன்று விசாரணைக்கு வந்தது.

வழக்கை விசாரித்த நீதிபதிகள், கடலூர், சேலம் மற்றும் மதுரை ஆகிய சிறைகளில் அடைக்கப்பட்டுள்ள தேனி சிறை கைதிகளை சட்டப் பணிகள் ஆணைக்குழு நேரில் ஆய்வு செய்ய வேண்டும் என உத்தரவிட்டனர்.

மேலும், அவர்களுக்கு மருத்துவ சிகிச்சை தேவையா என்பதை ஆய்வு செய்து அறிக்கை தாக்கல் செய்யுமாறு உத்தரவிட்ட நீதிபதிகள், வழக்கின் விசாரணையை வரும் நவம்பர் 13 ஆம் தேதிக்கு ஒத்திவைத்தனர்.