தனியார் அலைவரிசைக்கு 10 கோடி ரூபாய்: லஞ்ச ஒழிப்பு ஆணைக்குழுவில் முறைப்பாடு!

ஆசிய-பசிபிக் பிராந்திய ஒளிபரப்புச் ஒன்றியத்தின் 63 ஆவது மாநாடு கொழும்பில் அண்மையில் நடைபெற்றது. இந்த மாநாடு மற்றும் அது சார்ந்த நிகழ்ச்சிகளை நடத்துவதற்காகத் தனியார் தொலைக்காட்சி அலைவரிசை ஒன்றுக்கு அரசாங்கம் 10 கோடி ரூபாய் பணத்தை வழங்கியதாகக் குற்றச்சாட்டு எழுந்துள்ளது.

இது தொடர்பாக 'ஜனநாயகத்திற்கான சமூக ஊடக செயற்பாட்டாளர்களின் சங்கம்' லஞ்சம் அல்லது ஊழல் பற்றிய குற்றச்சாட்டுகளை புலனாய்வு செய்வதற்கான ஆணைக்குழுவில் முறைப்பாடு செய்துள்ளது.

அதேவேளை, இக்குற்றச்சாட்டுகள் குறித்து இன்று நடைபெற்ற அமைச்சரவை தீர்மானங்களை அறிவிக்கும் ஊடகவியலாளர் சந்திப்பில் பதிலளித்த அரசாங்கப் பேச்சாளர் அமைச்சர் கலாநிதி நளிந்த ஜயதிஸ்ஸ, குறித்த அலைவரிசைக்கு ஒதுக்கப்பட்ட பணம் அரசாங்கத்தின் பொது வரிப்பணம் அல்லவென்றும், அது சுற்றுலா அபிவிருத்திப் பணியகத்தின் நிதி என்றும் தெளிவுபடுத்தியுள்ளார்.