சைபர் தாக்குதல் மற்றும் போலி கணக்குகள் அச்சுறுத்தல்: அவசர ஆலோசனையில் இலங்கை வங்கி உயர் அதிகாரிகள்!

இலங்கையின் வங்கித் துறையை இலக்கு வைத்து, சர்வதேச அளவில் ஒருங்கிணைக்கப்பட்ட டிஜிட்டல் நிதி மோசடிக் குழுக்கள் தீவிரமாகச் செயல்பட்டு வருவதாகக் குற்றப் புலனாய்வுத் திணைக்களமும் வங்கித் துறைத் தலைவர்களும் எச்சரிக்கை விடுத்துள்ளனர்.

பொதுமக்களின் வங்கி கணக்குகளை வாடகைக்கு அல்லது விலைக்கு வாங்கி , அதன் மூலம் சட்டவிரோதமான மற்றும் சர்வதேச நிதிக் குற்றங்களுக்கான பணப் பரிவர்த்தனைகளைச் செய்வது கண்டுபிடிக்கப்பட்டுள்ளது. இதன் மூலம் பல கோடிக்கணக்கான பணம் கைமாறியுள்ளதாக அதிர்ச்சித் தகவல்கள் வெளியாகியுள்ளன. 

வங்கி கணக்குகள் துஷ்பிரயோகம்: இலகுவாக வருமானம் ஈட்டித் தருவதாகக் கூறி சாமானிய மக்களிடம் பெறப்படும் வங்கி கணக்குகள், சர்வதேசக் குற்றங்களுக்குப் பயன்படுத்தப்படுகின்றன.  

இத்தகைய மோசடிகளில் அறியாமல் சிக்கும் நபர்கள் மீது கடுமையான சட்ட நடவடிக்கை எடுக்கப்படும் எனக் குற்றப் புலனாய்வுத் திணைக்களம் எச்சரித்துள்ளது.  

சைபர் ஊடுருவல்கள், இ-மெயில் மோசடிகள் மற்றும் 'மியூல் கணக்குகள்' மூலமாக நாட்டின் நிதிப் பாதுகாப்புக்கும் வங்கியியல் கட்டமைப்புக்கும் பெரும் ஆபத்து உருவாகியுள்ளதால் வங்கி உயர் அதிகாரிகள் தீவிர ஆலோசனையில் ஈடுபட்டுள்ளனர். 

வங்கிக் கணக்குகளின் விபரங்களை முன்பின் தெரியாத நபர்களிடம் பகிர்வதைத் தவிர்க்குமாறும், சந்தேகத்திற்கிடமான பரிவர்த்தனைகள் குறித்து உடனடியாக வங்கிகளுக்குத் தெரிவிக்குமாறும் மத்திய வங்கி மற்றும் காவல்துறை பொதுமக்களைக் கேட்டுக்கொண்டுள்ளனர்.