மும்பையில் ஊர்வலத்தின் போது 22 அடி உயர விநாயகர் சிலை சரிந்து விழுந்து சோகம் – இருவர் பரிதாப பலி, 5 பேர் படுகாயம்!

மும்பையில் விநாயகர் சதுர்த்தி விழாவிற்காக பிரம்மாண்டமாக ஊர்வலமாக கொண்டு வரப்பட்ட 22 அடி உயர விநாயகர் சிலை திடீரென சரிந்து விழுந்ததில் இருவர் உயிரிழந்துள்ளனர். மேலும் 5 பேர் படுகாயமடைந்துள்ளனர்.

தெற்கு மும்பையின் பூலேஷ்வர் பகுதியில், Bhuleshwaracha Raja விநாயகர் சிலையை வரவேற்பதற்கான ஊர்வலம் வெகுவிமர்சையாக நடைபெற்றுக்கொண்டிருந்தது.

'லால்பாக்' பகுதியிலிருந்து பந்தலை நோக்கி 22 அடி உயர விநாயகர் சிலையை டிராலியில் வைத்து நகர்த்தி வந்தபோது, சிலையின் சட்டகத்தில் இருந்த வெல்டிங் உடைந்ததால், சிலை சட்டென்று சமநிலை இழந்து அங்கிருந்த பக்தர்கள் மீது சரிந்து விழுந்தது.

இந்த விபத்தில் படுகாயமடைந்தவர்கள் உடனடியாக மருத்துவமனைக்குக் கொண்டு செல்லப்பட்டனர். எனினும், கணபதி மண்டலத் தலைவர் சங்கேத் நெவ்சே (33) மற்றும் பிரிஜேஷ் ஜோஷி (30) ஆகிய இருவர் சிகிச்சை பலனின்றி பரிதாபமாக உயிரிழந்தனர்.

காயமடைந்த ஐந்து பேரில் 5 மற்றும் 7 வயதுடைய இரு சிறுமிகளும் அடங்குவர். அவர்களுக்குத் தொடர்ந்து தீவிர சிகிச்சை அளிக்கப்பட்டு வரும் நிலையில், அனைவரது நிலையும் சீராக இருப்பதாக மருத்துவர்கள் தெரிவித்துள்ளனர்.

சம்பவம் குறித்து வழக்குப் பதிவு செய்துள்ள மும்பை காவல்துறையினர் மற்றும் தீயணைப்புத் துறையினர், சிலை தாங்கிய அமைப்பில் ஏற்பட்ட கோளாறு குறித்து தீவிர விசாரணை மேற்கொண்டு வருகின்றனர்.