இலங்கை இளைஞர்களின் தொழில்சார் திறன்களை உயர்த்த UAE விசேட திட்டம்

இலங்கையிலுள்ள தொழிற்பயிற்சி நிலையங்களின் தரத்தை சர்வதேச நிலைக்கு உயர்த்தல், புதிய நவீன தொழினுட்பப் பாடநெறிகளை அறிமுகப்படுத்தல் மற்றும் பயிற்றுவிப்பாளர்களுக்குத் தேவையான உயர்மட்டப் பயிற்சிகளை வழங்குதல் ஆகிய முக்கிய அம்சங்கள் இத்திட்டத்தில் உள்ளடங்கியுள்ளன.

நாட்டில் அதிகரித்து வரும் இளைஞர் விவகார மற்றும் வேலைவாய்ப்புத் தேவைகளைக் கருத்திற் கொண்டும், சர்வதேச வேலைவாய்ப்புச் சந்தைக்கு ஏற்றவகையில் இலங்கை இளைஞர்களின் தொழில்சார் திறன்களை (Skills) மேம்படுத்தும் நோக்கிலும் இந்த இருதரப்புக் கூட்டுப்பணி அமையவுள்ளது.

குறிப்பாக, தகவல் தொழில்நுட்பம், விருந்தோம்பல் (Hospitality), பொறியியல் மற்றும் புதுப்பிக்கத்தக்க சக்தி (Renewable Energy) போன்ற துறைகளில் தொழிற்கல்வியைப் பலப்படுத்துவது குறித்து விசேட கவனம் செலுத்தப்படவுள்ளது.

இத்திட்டத்தின் மூலம் தொழிற்கல்வியை முடிக்கும் இலங்கை மாணவர்களுக்கு மத்திய கிழக்கு நாடுகள் உட்பட சர்வதேச ரீதியில் உயர்தர வேலைவாய்ப்புகளை இலகுவாகப் பெற்றுக்கொள்வதற்கான வாய்ப்புகள் அதிகரிக்கும் என எதிர்பார்க்கப்படுகிறது.

இரு நாடுகளுக்கும் இடையிலான இந்த ஒத்துழைப்பு, இலங்கையின் பொருளாதார வளர்ச்சிக்கு வலுவூட்டுவதுடன் இளைஞர்களின் எதிர்கால தொழில்வாழ்க்கைக்குப் புதிய பாதையைத் திறக்கும் எனத் துறைசார் அதிகாரிகள் நம்பிக்கை தெரிவித்துள்ளனர்.