தீவிரமடையும் எல் நினோவால் இலங்கைக்கு ஐ.நா. சிவப்பு எச்சரிக்கை!

எல் நினோ காலநிலை மாற்றம் தீவிரமடைந்து வருவதைத் தொடர்ந்து, ஆசிய-பசிபிக் பிராந்தியத்தில் இலங்கைக்கு அதிகளவில் கண்காணிப்பு தேவைப்படும் நாடாக ஐக்கிய நாடுகள் சபை மற்றும் வளிமண்டலவியல் திணைக்களம் எச்சரிக்கை விடுத்துள்ளன.

வழக்கமாக எல் நினோ காலத்தில் வறட்சி ஏற்படும் நிலைக்கு மாறாக, இம்முறை இலங்கையில் வழக்கத்தை விடவும் மிக தீவிரமான மழைப்பொழிவு மற்றும் வெள்ளப்பெருக்கு ஏற்படுவதற்கான சாத்தியக்கூறுகள் அதிகமாக உள்ளதாக ஐ.நா.வின் புதிய அறிக்கையில் சுட்டிக்காட்டப்பட்டுள்ளது.

வரவிருக்கும் அக்டோபர், நவம்பர் மாதங்களில் இரண்டாம் இடைப் பருவக்காற்று காலத்திலும், அதனைத் தொடர்ந்து டிசம்பர் முதல் பிப்ரவரி வரையிலான வடகிழக்கு பருவக்காற்று காலத்திலும் இயல்பை விட மிக அதிகமான மழை பெய்ய வாய்ப்புள்ளது.  

தீவிர மழைப்பொழிவால் நாட்டின் பல மாவட்டங்களில் பெருவெள்ளம், நிலச்சரிவு மற்றும் தாழ்நிலப் பகுதிகள் நீரில் மூழ்கும் அபாயம் நிலவுகிறது.  

செப்டம்பர் முதல் தொடங்கவிருக்கும் முக்கிய பெரும்போக (மஹா) விவசாயச் சாகுபடி பருவத்தில் அதிக மழை பெய்வது பயிர்ச்செய்கை நடவடிக்கைகளைப் பாதிக்கலாம் என அஞ்சப்படுகிறது.  

பெருமழை மற்றும் நீர்வரத்து காரணமாக நீர்நிலைகளின் மட்டம் உயரும் என்றாலும், முன்னெச்சரிக்கை நடவடிக்கைகளை அரசு மற்றும் பேரிடர் மேலாண்மை அமைப்புகள் உடனடியாகத் தீவிரப்படுத்த வேண்டும் என ஐ.நா கேட்டுக்கொண்டுள்ளது. 

அதிகாரிகள் மற்றும் பொதுமக்கள் வானிலை அறிக்கைகளைக் கூர்ந்து கவனித்து, பேரிடர் அபாயத்தைக் குறைப்பதற்கான ஆயத்தப் பணிகளில் ஈடுபட அறிவுறுத்தப்படுகிறார்கள்.