எரிபொருள் விலை உயர்வின் சுமையை மக்கள் மீது சுமத்த மாட்டோம்: அமைச்சர் நளிந்த ஜயதிஸ்ஸ!

அரசாங்க தகவல் திணைக்களத்தில் நடைபெற்ற செய்தியாளர் சந்திப்பில் கலந்துகொண்டு கருத்துத் தெரிவிக்கையிலேயே அவர் இதனைக் குறிப்பிட்டார்.

இது தொடர்பில் அவர் மேலும் தெரிவிக்கையில்,

உலக சந்தை விலை உயர்வுக்கு ஏற்ப நாமும் விரைவாகவும் பெருமளவிலும் எரிபொருள் விலையை உயர்த்தியிருக்க வேண்டும். ஆனால், கடந்த ஏப்ரல் மாதத்தில் 57 பில்லியன் ரூபாயையும், தற்போது 41 பில்லியன் ரூபாயையும் திறைசேரியிலிருந்து ஒதுக்கி, விலை உயர்வின் சுமையை மக்களிடம் கொண்டு செல்லாமல் அரசாங்கமே ஏற்றுக்கொண்டுள்ளது.

கடந்த 4-5 மாதங்களுக்குள் மட்டும் சுமார் 100 பில்லியன் ரூபாய்க்கும் அதிகமான தொகையை அரசாங்கம் மக்கள் மீது சுமத்தாமல் தாங்கிக்கொண்டுள்ளது.

அரசாங்கம் என்ற ரீதியில் திறைசேரியைச் சரியாக முகாமை செய்து, இவ்வாறானதொரு நெருக்கடியான சந்தர்ப்பத்தில் மக்களின் வரிப் பணத்தின் மூலம் மக்கள் மீதான சுமையைக் குறைப்பதே எமது கடமையாகும். திறைசேரியால் தாங்கிக்கொள்ளக்கூடிய உச்ச வரம்பு வரை மக்களுக்காக நாம் தொடர்ந்தும் நிவாரணங்களை வழங்குவோம் என அவர் மேலும் தெரிவித்தார்.