இலங்கையில் களைகட்டும் சுற்றுலாத்துறை: வருகை தந்த பயணிகளின் எண்ணிக்கை மேலும் அதிகரிப்பு!

இலங்கைக்கு வருகை தரும் வெளிநாட்டு சுற்றுலாப் பயணிகளின் எண்ணிக்கை மேலும் கணிசமாக அதிகரித்துள்ளதாக இலங்கை சுற்றுலா வளர்ச்சி ஆணைக்குழு தெரிவித்துள்ளது.

நடப்பு ஆண்டில் ஜனவரி 1 ஆம் திகதி முதல் ஆகஸ்ட் நடுப்பகுதி வரையிலான காலப்பகுதியில் 14 லட்சத்து 60 ஆயிரத்திற்கும் அதிகமான வெளிநாட்டுச் சுற்றுலாப் பயணிகள் நாட்டிற்கு வருகை தந்துள்ளனர்.

இலங்கைக்கு அதிகளவில் வருகை தந்த சுற்றுலாப் பயணிகளின் பட்டியலில் இந்தியா முதலிடத்தில் உள்ளது. இதுவரை 3 லட்சத்து 66 ஆயிரத்திற்கும் அதிகமான இந்தியச் சுற்றுலாப் பயணிகள் வருகை தந்துள்ளனர்.

இந்தியாவைத் தொடர்ந்து பிரித்தானியா, சீனா, பிரான்ஸ் மற்றும் ரஷ்யா ஆகிய நாடுகளிலிருந்து அதிகளவிலான சுற்றுலாப் பயணிகள் வருகை தந்துள்ளனர்.

ஆகஸ்ட் மாதத்தின் முதல் 18 நாட்களில் மட்டும் 1 லட்சத்து 25 ஆயிரத்திற்கும் மேற்பட்டோர் வருகை தந்துள்ளதாகத் தெரிவிக்கப்பட்டுள்ளது.

நாட்டின் பொருளாதாரம் சீரடைந்து வருவதாலும், சுற்றுலாத் துறையை மேம்படுத்த அரசாங்கம் எடுத்து வரும் பிரசார நடவடிக்கைகள் மற்றும் நேரடி விமானச் சேவைகளின் அதிகரிப்பு காரணமாகவும் வருகையாளர்களின் எண்ணிக்கை தொடர்ந்து அதிகரித்து வருவதாகச் சுற்றுலாத்துறை வட்டாரங்கள் தெரிவிக்கின்றன.