சூரிச்–வின்டர்தூர் ரயில் பாதை விரிவாக்கம் – 10 ஆண்டுகள் கட்டுமானப் பணிகள்

திட்டத்தின் முக்கிய அம்சமாக, சுமார் 9 கிலோமீட்டர் நீளமுள்ள புரூட்டென் சுரங்கப்பாதை அமைக்கப்படவுள்ளது. இரண்டு தனித்தனி சுரங்கப்பாதைகளில் ரயில்கள் மணிக்கு 160 கிலோமீட்டர் வேகத்தில் பயணிக்க முடியும்.

மேலும், வின்டர்தூர்-டோஸ், பாஸர்ஸ்டோர்ஃப், வாலிசெல்லன் மற்றும் டீட்லிகான் ஆகிய நான்கு ரயில் நிலையங்களும் மேம்படுத்தப்பட உள்ளன.

தற்போது சூரிச்–வின்டர்தூர் இடையே தினமும் சுமார் 670 ரயில்களில் ஒரு லட்சத்து 20 ஆயிரத்துக்கும் மேற்பட்ட பயணிகள் பயணிக்கின்றனர். திட்டம் நிறைவடைந்த பின்னர், தினசரி ரயில் சேவைகள் சுமார் 900 ஆக அதிகரிக்கும் என எதிர்பார்க்கப்படுகிறது.

புதிய சுரங்கப்பாதை மூலம் சூரிச் முதல் வின்டர்தூர் வரையிலான பயண நேரம் அதிகபட்சமாக எட்டு நிமிடங்கள் குறையும். பிராந்திய ரயில்கள் 15 நிமிட இடைவெளியில் இயக்கப்படுவதுடன், ரயில் சேவைகளின் நம்பகத்தன்மையும் மேம்படும் என தெரிவிக்கப்பட்டுள்ளது.

இந்தத் திட்டத்துக்கு மொத்தம் சுமார் 3.3 பில்லியன் சுவிஸ் பிராங்குகள் செலவாகும். அடுத்த பத்து ஆண்டுகளில், நாளொன்றுக்கு சராசரியாக ஒரு மில்லியன் பிராங்குகள் அளவுக்கு முதலீடு செய்யப்படும்.

இதற்கிடையில், கட்டுமானப் பணிகளால் அருகிலுள்ள குடியிருப்புப் பகுதிகளில் இரைச்சல், தூசி, கனரக வாகனப் போக்குவரத்து மற்றும் அதிர்வுகள் ஏற்படக்கூடும் என SBB தெரிவித்துள்ளது. சில பணிகளை இரவு நேரங்களிலும் வார இறுதி நாட்களிலும் மேற்கொள்ள வேண்டிய நிலை இருப்பதாகவும் கூறப்பட்டுள்ளது.

புரூட்டென் சுரங்கப்பாதை அமைக்கும் பணியில் சுமார் 45 லட்சம் டன் மண் தோண்டி எடுக்கப்படும். இந்த மண் சரக்கு ரயில்கள் மூலம் பல்வேறு இடங்களுக்கு கொண்டு செல்லப்பட உள்ளது.

முக்கிய கட்டுமானப் பணிகள் 2027ஆம் ஆண்டு தொடங்கும். சுரங்கம் தோண்டும் இயந்திரங்கள் 2029ஆம் ஆண்டு பணியைத் தொடங்கும் என எதிர்பார்க்கப்படுகிறது.

முழு கட்டுமானப் பணிகளும் 2036ஆம் ஆண்டுக்குள் நிறைவடையும் என திட்டமிடப்பட்டுள்ளது. புதிய ரயில் பாதை 2037ஆம் ஆண்டு டிசம்பர் மாத கால அட்டவணை மாற்றத்துடன் பயன்பாட்டுக்கு வரும் என SBB தெரிவித்துள்ளது.

கட்டுமானப் பணிகளின்போதும் ரயில் சேவைகளில் ஏற்படும் பாதிப்புகளைக் குறைக்க நடவடிக்கைகள் மேற்கொள்ளப்பட்டு வருகின்றன. இருப்பினும், 2026 டிசம்பர் கால அட்டவணை மாற்றத்துடன் சில S-Bahn சேவைகளில் மாற்றங்கள் ஏற்படலாம் என தெரிவிக்கப்பட்டுள்ளது.