அபராதம் செலுத்த முடியாமல் சிறையில் 1,500 கைதிகள்: அமைச்சர் ஹர்ஷன நாணயக்கார!

பாராளுமன்ற உறுப்பினர் ரோஹித அபேகுணவர்தன எழுப்பிய கேள்விக்கு பதிலளித்த போதே அமைச்சர் இந்தத் தகவலை வெளியிட்டார்.

அமைச்சர் வழங்கிய புள்ளிவிவரங்களின்படி, 10,000 முதல் 15,000 ரூபாய் வரையிலான குறைந்த அபராதத் தொகையைச் செலுத்த வழியின்றி 421 கைதிகள் சிறையில் அடைக்கப்பட்டுள்ளனர். மேலும் 15,000 முதல் 25,000 ரூபாய் வரை செலுத்த முடியாமல் 220 பேரும், 25,000 முதல் 50,000 ரூபாய் வரை செலுத்த முடியாமல் 361 பேரும் சிறையில் உள்ளனர்.

அத்துடன், நாட்டில் தற்போது மொத்தமாக 10,611 கைதிகளும், 28,408 சந்தேகநபர்களும் சிறைகளில் உள்ளதாகவும், வயதுப் பிரிவுகளின் அடிப்படையில் 30 முதல் 40 வயதுக்கு இடைப்பட்டவர்களே அதிகளவில் சிறையில் உள்ளதாகவும் தெரிவிக்கப்பட்டுள்ளது.

இவர்களை விடுவிப்பது குறித்துத் தொடர்ந்தும் கருத்துத் தெரிவித்த அமைச்சர், அபராதம் செலுத்த முடியாத நிலைமை ஒரு பெரிய குற்றமாக இருக்க முடியாது எனக் குறிப்பிட்டார். தொண்டு நிறுவனங்கள் அல்லது அமைப்புகள் முன்வந்து இத்தகைய கைதிகளின் அபராதத் தொகையைச் செலுத்தி அவர்களை விடுவிக்க விரும்பினால், சிறைச்சாலைத் துறை அதற்கு முழு ஒத்துழைப்பு வழங்கும் என்றும் அவர் சுட்டிக்காட்டினார்.