போதைப்பொருள் குற்றங்களில் 208 பொலிஸார் கைது, 1,500 அதிகாரிகள் சஸ்பெண்ட்: பொலிஸ் ஊடகப் பேச்சாளர் அதிரடித் தகவல்!

போதைப்பொருள் தொடர்பான குற்றங்கள் உட்படப் பல்வேறு குற்றங்களுடன் தொடர்புடைய குற்றச்சாட்டில் இதுவரை 208 பொலிஸ் அதிகாரிகள் கைது செய்யப்பட்டுள்ளதாகப் பொலிஸ் ஊடகப் பேச்சாளரும், உதவி பொலிஸ் அத்தியட்சகருமான எப்.யூ. வூட்லர் தெரிவித்துள்ளார். 'தெரண பிக் போக்கஸ்' நிகழ்ச்சியில் கலந்துகொண்டு பேசிய அவர், பல்வேறு தவறுகள் காரணமாக சுமார் 1,500 பொலிஸ் அதிகாரிகளின் சேவைகள் இடைநிறுத்தப்பட்டுள்ளதாகக் குறிப்பிட்டார்.

பொலிஸ் துறைக்குள் உள்ள ஊழல் நிறைந்த மற்றும் தகுதியற்ற அதிகாரிகளைக் கண்டறிந்து அவர்களுக்கு எதிராகக் கடுமையான சட்ட நடவடிக்கை எடுக்கப்பட்டு வருவதாக உறுதி அளித்த அவர், 2025 ஒக்டோபர் 30 முதல் இதுவரை 233 சிறுமிகள் உட்பட 11,131 சிறுவர்கள் பல்வேறு குற்றங்களில் கைது செய்யப்பட்டுள்ளதாகத் தெரிவித்தார்.

பாடசாலைகள் மற்றும் தனியார் வகுப்புகளை அண்மித்த பகுதிகளில் 'ஐஸ்' பக்கெட்டுகள், பொம்பே மிட்டாய் மற்றும் சாரவிட்ட போன்றவற்றின் ஊடாக சிறுவர்களுக்குப் போதைப்பொருள் விநியோகிக்கப்படுவதைத் தடுக்கப் புலனாய்வுப் பிரிவினர் தீவிரமாகக் களமிறக்கப்பட்டுள்ளனர். பிள்ளைகளின் உணவுப் பழக்கம், பேச்சு, நடத்தை மற்றும் நட்பு வட்டாரங்களில் மாற்றங்கள் ஏற்பட்டால் பெற்றோர்கள் உடனடியாக அவதானம் செலுத்த வேண்டும் என்றும் பொலிஸ் ஊடகப் பேச்சாளர் கேட்டுக்கொண்டுள்ளார்.