செயற்கை நுண்ணறிவுக்கு புதிய பெயர்? – அமெரிக்க அதிபர் டொனால்ட் டிரம்ப் யோசனை!

உலக அளவில் ஏஐ தொழில்நுட்பத்தின் பயன்பாடும் ஆதிக்கமும் அதிகரித்து வரும் நிலையில், இந்தத் துறை சார்ந்த கொள்கைகள் மற்றும் நிர்வாகக் கட்டமைப்பில் பல்வேறு மாற்றங்களை அமெரிக்க அரசு மேற்கொண்டு வருகிறது.

அமெரிக்கா மற்றும் உலக அளவிலான தொழில்நுட்ப சந்தையில் ஏஐ பெரும் தாக்கத்தை ஏற்படுத்தி வருகிறது. இந்நிலையில், 'செயற்கை நுண்ணறிவு' என்ற தற்போதைய பெயர் மிகவும் பொதுவானதாகவும், அமெரிக்காவின் தொழில்நுட்பத் தலைமையை முழுமையாகப் பிரதிபலிக்காததாகவும் டிரம்ப் கருதுவதாகக் கூறப்படுகிறது.

ஏஐ துறையில் சீனா உள்ளிட்ட பிற நாடுகளின் சவால்களை எதிர்கொள்ளவும், அமெரிக்காவின் முன்னிலையை உலகிற்குப் பறைசாற்றவும் புதிய பெயர் மற்றும் அடையாளத்தை உருவாக்க அரசு திட்டமிட்டுள்ளது.

அதிபர் டிரம்ப் தனது நிர்வாகத்தின் கீழ் தொழில்நுட்பத் துறையை மேலும் வலுப்படுத்த விரும்புவதாகவும், அதன் ஒரு பகுதியாகவே இந்த பெயர் மாற்ற நடவடிக்கை பரிசீலிக்கப்படுவதாகவும் வெள்ளை மாளிகை வட்டாரங்கள் தெரிவிக்கின்றன.

இருப்பினும், எந்த மாதிரியான புதிய பெயர் சூட்டப்படும் என்பது குறித்த அதிகாரப்பூர்வ அறிவிப்பு இன்னும் வெளியாகவில்லை. டொனால்ட் டிரம்பின் இந்த யோசனை சர்வதேச தொழில் நுட்ப வல்லுநர்கள் மற்றும் தொழிலதிபர்களிடையே பெரும் எதிர்பார்ப்பையும் சுவாரஸ்யத்தையும் ஏற்படுத்தியுள்ளது.