பற்றி எரிந்த விடுதி: 4 வயது குழந்தை உட்பட 9 பேர் உயிரிழப்பு!

மேற்கு வங்க மாநிலம் கொல்கத்தாவில் உள்ள ஐந்து மாடி கட்டடத்தில் ஏற்பட்ட பயங்கர தீ விபத்தில் 4 வயது குழந்தை உட்பட 9 பேர் உயிரிழந்தனர்.

மத்திய கொல்கத்தாவின் மிர்சா காலிப் தெருவில் இயங்கி வந்த ஐந்து மாடி கட்டடத்தில் அதிகாலை 2 மணி அளவில் திடீரென தீப்பற்றியது. தங்கும் விடுதிகள் மற்றும் கடைகள் நிறைந்த இந்த நெரிசலான கட்டடத்தில் தீ வேகமாக பரவியது.

தகவலறிந்து சம்பவ இடத்திற்கு விரைந்த தீயணைப்பு வாகனங்கள் மற்றும் பேரிடர் மீட்புக் குழுவினர் தீவிர மீட்புப் பணியில் ஈடுபட்டனர். கட்டடத்தில் சிக்கியிருந்த 60-க்கும் மேற்பட்டோர் பாதுகாப்பாக மீட்கப்பட்ட போதிலும், அடர்ந்த புகையின் காரணமாக மூச்சுத்திணறல் ஏற்பட்டு 9 பேர் உயிரிழந்தனர். மேலும் சிலர் காயமடைந்து மருத்துவமனையில் தீவிர சிகிச்சை பெற்று வருகின்றனர்.

சம்பவ இடத்தை அதிகாரிகள் நேரில் சென்று ஆய்வு செய்துள்ளனர். இது மின் கசிவு காரணமாக தீ விபத்தாக ஏற்பட்டிருக்கலாம் என சந்தேகிக்கப்படுகிறது. இதுகுறித்து விசாரணை நடத்த சிறப்பு விசாரணைக்குழு (SIT) அமைக்கப்பட்டுள்ளதாகக் காவல்துறை தெரிவித்துள்ளது.