பாகிஸ்தானில் ஆப்கான் மாணவர்கள் மருத்துவம் பயில தடை: படித்து வரும் மாணவர்களும் உடனடியாக வெளியேற உத்தரவு!

பாகிஸ்தானுக்கும் ஆப்கானிஸ்தானுக்கும் இடையே நிலவி வரும் ராஜதந்திர பதற்றங்களுக்கு மத்தியில், பாகிஸ்தானில் உள்ள மருத்துவக் கல்லூரிகளில் ஆப்கானிஸ்தான் மாணவர்கள் பயில்வதற்கு அந்நாட்டு அரசு அதிரடித் தடை விதித்துள்ளது. மேலும், ஏற்கனவே படித்து வரும் மாணவர்களையும் படிப்பை பாதியிலேயே நிறுத்திவிட்டு உடனடியாக நாட்டை விட்டு வெளியேறுமாறு உத்தரவிடப்பட்டுள்ளது.

பாகிஸ்தான் மருத்துவ மற்றும் பல் மருத்துவக் கவுன்சில் (PMDC) வெளியிட்டுள்ள புதிய உத்தரவின்படி, நாட்டில் உள்ள அரசு மற்றும் தனியார் மருத்துவக் கல்லூரிகளில் ஆப்கான் மாணவர்களுக்குப் புதிய சேர்க்கை வழங்கக் கூடாது எனத் தெரிவிக்கப்பட்டுள்ளது.

ஏற்கனவே இளங்கலை மருத்துவம் (MBBS) மற்றும் பல் மருத்துவம் பயின்று வரும் ஆப்கானிஸ்தான் மாணவர்கள் அனைவரையும் உடனடியாகத் தாய்நாட்டிற்குத் திருப்பி அனுப்புமாறு அனைத்து மருத்துவ நிறுவனங்களுக்கும் அறிவுறுத்தப்பட்டுள்ளது. லாகூரில் உள்ள கிங் எட்வர்ட் மருத்துவப் பல்கலைக்கழகம் போன்ற முதன்மை உயர்கல்வி நிறுவனங்கள் இந்த உத்தரவை அமல்படுத்தத் தொடங்கியுள்ளன.

படிப்பை முடிக்கும் தருவாயில் உள்ள இறுதியாண்டு மாணவர்கள் உட்பட நூற்றுக்கணக்கான ஆப்கான் மாணவர்களின் எதிர்காலம் இந்த முடிவால் கேள்விக்குறியாகியுள்ளது. குறிப்பாக ஆப்கானிஸ்தானில் பெண்களுக்கு உயர்கல்வி மறுக்கப்பட்டுள்ள நிலையில், பாகிஸ்தானில் பயின்று வந்த பெண் மருத்துவ மாணவிகளின் எதிர்காலம் பெரிதும் பாதிக்கப்பட்டுள்ளது.

பாகிஸ்தானில் எல்லைப் பகுதிகளில் நடைபெறும் பயங்கரவாதத் தாக்குதல்களுக்கு ஆப்கானிஸ்தான் மண்ணே காரணம் என இஸ்லாமாபாத் குற்றம்சாட்டி வரும் நிலையில், இரு நாடுகளுக்கும் இடையிலான உறவில் பெரும் விரிசல் ஏற்பட்டுள்ளது. இதன் தொடர்ச்சியாகவே ஆப்கான் மாணவர்களுக்கான இந்த கெடுபிடி நடவடிக்கை எடுக்கப்பட்டுள்ளதாகக் கூறப்படுகிறது.