முன்னாள் அமைச்சர் பசில் ராஜபக்ஷவை கைது செய்ய திறந்த பிடியாணை!

மாத்தறை பிரவுன்ஸ் ஹில் காணி விவகாரம் தொடர்பான வழக்கு விசாரணை இன்று மாத்தறை நீதவான் நீதிமன்றத்தில் எடுத்துக்கொள்ளப்பட்டபோதே இந்த உத்தரவு பிறப்பிக்கப்பட்டுள்ளது.

குறித்த வழக்கு விசாரணைகளுக்குத் தொடர்ந்து நீதிமன்றத்தில் முன்னிலையாகத் தவறியதைத் தொடர்ந்தே, முன்னாள் அமைச்சர் பசில் ராஜபக்ஷவைக் உடனடியாகக் கைது செய்யுமாறு மாத்தறை நீதவான் நீதிமன்றம் இந்தத் திறந்த பிடியாணையினை பிறப்பித்துள்ளது.

ஏற்கனவே பொதுச் சொத்துக்களை தவறாகப் பயன்படுத்திய குற்றச்சாட்டுகள் தொடர்பாகவும், குற்றப் புலனாய்வுத் துறையினரின் விசாரணைகள் தொடர்பாகவும் இவருக்கு எதிராகப் பிடியாணை உத்தரவுகள் பிறப்பிக்கப்பட்டிருந்த நிலையில், தற்போது திறந்த பிடியாணை பிறப்பிக்கப்பட்டிருப்பது குறிப்பிடத்தக்கது.

தற்போது வெளிநாட்டில் இருப்பதாகக் கருதப்படும் பசில் ராஜபக்ஷவைக் கைது செய்து நீதிமன்றத்தில் முன்னிலைப்படுத்துவதற்காக சர்வதேச பொலிஸின் உதவியைப் பெறுவதற்கும் நடவடிக்கை எடுக்கப்பட்டு வருவதாக தெரிவிக்கப்படுகிறது.