மட்டக்களப்பில் சோகம்: குளியலறை வாளிக்குள் விழுந்து ஒரு வயதுக் குழந்தை பலி!

அக்விவ் விகான் என்ற ஒரு வயதுக் குழந்தையே இவ்வாறு பரிதாபமாக உயிரிழந்துள்ளது.

இச்சம்பவம் குறித்த மேலும் தெரியவருவதாவது:

குழந்தையின் தாய் வீட்டில் குளியலறையில் துணிகளைத் துவைத்துவிட்டு, அவற்றை வாசற்படியில் காயவைத்துக்கொண்டிருந்துள்ளார். இதன்போது, தூங்கிக்கொண்டிருந்த குழந்தை விழித்துக்கொண்டு குளியலறையை நோக்கிச் சென்றதை தாய் கண்டுள்ளார்.

உடனடியாகக் குழந்தையைக் குளிப்பாட்டுவதற்காக வேறு உடைகளை எடுப்பதற்காகத் தாய் வீட்டிற்குள் சென்றுள்ளார். அந்நேரத்தில், குளியலறையில் துணி துவைத்த பிறகு எஞ்சியிருந்த நீர் நிரம்பிய வாளிக்குள் குழந்தை எதிர்பாராதவிதமாக விழுந்துள்ளது.

சிறிது நேரத்தில் தாய் அங்கு வந்து பார்த்தபோது, குழந்தை வாளிக்குள் தலைகீழாக விழுந்து, மூச்சுவிட முடியாத நிலையில் இருந்ததாகப் பொலிஸ் விசாரணையில் தெரியவந்துள்ளது.

இதனைத் தொடர்ந்து மேற்கொள்ளப்பட்ட பிரேதப் பரிசோதனையின் பின்னர், குழந்தையின் சடலம் இறுதிச் சடங்குகளுக்காகக் குடும்பத்தினரிடம் ஒப்படைக்கப்பட்டுள்ளது. இச்சம்பவம் தொடர்பில் ஏறாவூர் பொலிஸார் மேலதிக விசாரணைகளை மேற்கொண்டு வருகின்றனர்.