கைதான தேசிய மக்கள் சக்தி பிரதேச சபை தவிசாளருக்கு சரீரப் பிணை!

ஓய்வுபெற்ற ஆசிரியை ஒருவரையும், பொறியியலாளரான அவரது மகனையும் பிரதேச சபை வளாகத்திற்குள் அழைத்துக் பூட்டி வைத்து, உடல் மற்றும் உள ரீதியாகத் துன்புறுத்திய குற்றச்சாட்டின் பேரில் தேசிய மக்கள் சக்தியைச் சேர்ந்த பிரதேச சபை தவிசாளர் உள்ளிட்ட குழுவினர் திஹகொட பொலிஸாரால் கைது செய்யப்பட்டிருந்தனர்.

வீதி ஒன்றில் மதில் அமைப்பது தொடர்பாக ஏற்பட்ட தர்க்கத்தை அடுத்து, சுவரின் சட்டப்பூர்வத் தன்மை குறித்து ஆலோசிக்க வேண்டும் எனக் கூறி இவ்விருவரையும் பிரதேச சபைக்கு அழைத்தே இந்த அத்துமீறல் முன்னெடுக்கப்பட்டுள்ளதாகக் கூறப்படுகிறது.

பாதிக்கப்பட்டவர்களின் முறைப்பாட்டின் அடிப்படையில் பொலிஸார் மேற்கொண்ட விசாரணைகளைத் தொடர்ந்து சந்தேகநபர்கள் கைது செய்யப்பட்டு நீதிமன்றத்தில் ஆஜர்படுத்தப்பட்டனர். வழக்கு விசாரணைகளை மேற்கொண்ட நீதவான், இரு தரப்பு வாதங்களையும் பரிசீலித்த பின்னர் தவிசாளர் உள்ளிட்ட ஐவரையும் பிணையில் செல்ல அனுமதித்து உத்தரவிட்டார்.