நீதிமன்ற அவமதிப்பு வழக்கு: இளையராஜாவின் சொத்துகளைப் பறிமுதல் செய்ய 'சரிகம' மனு!

பிரபல இசையமைப்பாளர் இளையராஜாவுக்கு எதிராக ‘சரிகம’ = நிறுவனம் டெல்லி உயர் நீதிமன்றத்தில் நீதிமன்ற அவமதிப்பு மனு ஒன்றைத் தாக்கல் செய்துள்ளது. நீதிமன்ற உத்தரவை மீறி செயல்பட்டதாகக் கூறி, அவரது அசையும் மற்றும் அசையா சொத்துகளைப் பறிமுதல் செய்ய வேண்டும் என அதில் வலியுறுத்தப்பட்டுள்ளது.

‘சரிகம’ நிறுவனத்திற்குச் சொந்தமான காப்புரிமை பெற்ற பாடல்களை இளையராஜா பயன்படுத்தவோ, பிறருக்கு உரிமம் வழங்கவோ அல்லது உரிமை கோரவோ கூடாது என கடந்த பிப்ரவரி மாதம் டெல்லி உயர் நீதிமன்றம் இடைக்காலத் தடை விதித்திருந்தது.

நீதிமன்ற உத்தரவு அமலில் இருந்தபோதிலும், ஸ்பாட்டிஃபை மற்றும் யூடியூப் போன்ற டிஜிட்டல் தளங்களில் குறிப்பிட்ட பாடல்களைத் தொடர்ந்து பயன்படுத்தி வந்ததாகவும், மூன்றாம் தரப்பினரிடம் பாடல்களுக்கான உரிமையைக் கோரியதாகவும் 'சரிகம' குற்றம் சாட்டியுள்ளது.

நீதிமன்ற உத்தரவை வேண்டுமென்றே மீறியதற்காக இளையராஜாவை சிறையில் அடைக்க வேண்டும், அவரது சொத்துகளைப் பறிமுதல் செய்ய அதிகாரியை நியமித்து அதை விற்பனை செய்து நஷ்டஈடு வழங்க வேண்டும் என மனுவில் கோரப்பட்டுள்ளது.

இந்த அவமதிப்பு மனுவை விசாரித்த நீதிபதி அனுப் ஜெயராம் பம்பானி, இது குறித்து இசையமைப்பாளர் இளையராஜா பதிலளிக்க உத்தரவிட்டு நோட்டீஸ் அனுப்பியுள்ளார்.

ஏற்கனவே இரு தரப்புக்கும் இடையே காப்புரிமை தொடர்பான சட்டப் போராட்டம் தீவிரமடைந்துள்ள நிலையில், 'சரிகம' நிறுவனத்தின் இந்த புதிய நடவடிக்கை திரையுலகில் பெரும் பரபரப்பை ஏற்படுத்தியுள்ளது.