இலங்கையில் 80 அரச இணையதளங்களுக்கு சைபர் பாதுகாப்பு அச்சுறுத்தல் – ஆய்வாளர் எச்சரிக்கை!

அவர் வெளியிட்ட தகவலின்படி, இந்த இணையதளங்களில் 61 தளங்கள், நீண்ட காலமாகப் பாதுகாப்புப் புதுப்பிப்புகள் வழங்கப்படாத பழைய மென்பொருள் பதிப்புகளைப் பயன்படுத்துகின்றன. இதனால் அரசுத் துறைகள், சுகாதார நிறுவனங்கள் மற்றும் முக்கிய தேசிய உள்கட்டமைப்புகளுடன் தொடர்புடைய இணையதளங்கள் ஆபத்தில் இருக்கலாம் எனத் தெரிவிக்கப்பட்டுள்ளது.

PHP மென்பொருளில் கண்டறியப்பட்டுள்ள இரண்டு தீவிரமான பாதுகாப்புக் குறைபாடுகள் காரணமாக, கடவுச்சொல் இல்லாமலேயே இணையதளங்களுக்குப் பின்னால் உள்ள கணினிகளைக் கட்டுப்படுத்தும் அபாயம் இருப்பதாக ஆய்வாளர் குறிப்பிட்டுள்ளார். இதனால் குடிமக்களின் தனிப்பட்ட தகவல்கள் மற்றும் சுகாதாரத் தரவுகளும் பாதிக்கப்படலாம் என எச்சரிக்கப்பட்டுள்ளது.

பாதிக்கப்பட்ட இணையதளங்களை 48 மணி நேரத்திற்குள் பாதுகாப்புப் புதுப்பிப்புகளுடன் சீரமைக்கவும், முடியாவிட்டால் தற்காலிகமாக முடக்கவும் அவர் அரசாங்கத்திடம் கோரிக்கை விடுத்துள்ளார். மேலும், ஒரு வாரத்திற்குள் தாக்குதல்கள் ஏற்கெனவே நடந்துள்ளனவா என்பதைச் சரிபார்க்கவும், பழைய மென்பொருளைப் பயன்படுத்தும் இணையதளங்களை மூன்று மாதங்களுக்குள் சீரமைக்கவும் பரிந்துரைத்துள்ளார்.