சவூதி அரேபியாவில் சிறை வைக்கப்பட்டுள்ள அனோஜன் சிவராசாவை நேரில் சந்தித்தார் இலங்கைத் தூதுவர் அமீர் அத்வாஜ்!

சவூதி அரேபியாவின் தம்மாம் மத்திய சிறைச்சாலையில் தடுத்து வைக்கப்பட்டுள்ள இலங்கைக் குடிமகன் அனோஜன் சிவராசாவை, சவூதி அரேபியாவுக்கான இலங்கைத் தூதுவர் ஒ.எல். அமீர் அத்வாஜ் நேரில் சந்தித்துப் பேசினார்.

சவூதி தலைநகர் ரியாத்தில் இருந்து சுமார் 450 கிலோமீற்றர் தூரத்தில் அமைந்துள்ள தம்மாம் மத்திய சிறைச்சாலைக்குச் சென்ற தூதுவர், அனோஜன் சிவராசாவின் உடல்நலம் மற்றும் தற்போதைய நிலைமைகள் குறித்து கேட்டறிந்து கொண்டார்.

இதன்போது, தம்மாம் மத்திய சிறைச்சாலையின் பணிப்பாளர் மற்றும் சிறைச்சாலை வைத்தியரையும் சந்தித்த தூதுவர் அமீர் அத்வாஜ், அனோஜன் சிவராசாவுக்கு வழங்கப்பட்டுவரும் பராமரிப்புகளுக்கும், இந்தச் சந்திப்புக்கு ஒத்துழைப்பு வழங்கியமைக்கும் நன்றிகளைத் தெரிவித்தார்.

சமூக வலைத்தளப் பதிவு ஒன்றுடன் தொடர்புடைய வழக்கில் அனோஜன் சிவராசாவுக்கு எதிராக விதிக்கப்பட்டிருந்த மரண தண்டனை சவூதி உச்ச நீதிமன்றத்தினால் ரத்து செய்யப்பட்டுள்ள நிலையில், தூதுவரின் இந்தச் சந்திப்பு முக்கியத்துவம் பெற்றுள்ளமை குறிப்பிடத்தக்கது.

அனோஜன் சிவராசாவுக்கான மேலதிக சட்ட முன்னெடுப்புகள் மற்றும் மேன்முறையீட்டு நடவடிக்கைகளுக்கு இலங்கைத் தூதரகம் தொடர்ந்தும் தீவிர உதவிகளை வழங்கி வருவதாகத் தூதரகம் தெரிவித்துள்ளது.