புதிய குற்றத் தடுப்புச் சட்டம் குறித்து பொய்யான வதந்திகள்: பாராளுமன்றத்தில் நீதியமைச்சர் கடும் கண்டனம்!

பாராளுமன்றத்தில் சமர்ப்பிக்கப்பட்ட இந்தச் சட்டமூலத்தின் மூலம் போதைப்பொருள் கடத்தல், ஆட்கடத்தல் மற்றும் கொலைகளை ஒழிப்பதற்கான சட்ட வலு அரசாங்கத்திற்கு கிடைத்துள்ளதாகத் தெரிவித்த அமைச்சர், இது குறித்து சமூக வலைத்தளங்களில் தவறான தகவல்கள் பரப்பப்படுவதாகச் சுட்டிக்காட்டினார்.

குறிப்பாக, தலைமுடி நீளமாக வளர்த்திருந்தாலோ அல்லது பச்சைக்குத்திக் கொண்டிருந்தாலோ குற்றவாளிகளாகக் கருதப்பட்டு சிறையில் அடைக்கப்படுவார்கள் என்பன போன்ற வதந்திகளுக்கும் இச்சட்டத்திற்கும் எந்தத் தொடர்பும் இல்லை என அவர் தெளிவுபடுத்தினார்.

பொதுமக்கள் தங்களுக்குப் பிடித்த ஆடைகளை அணிவது அல்லது முடி அலங்காரம் செய்வதற்கான தனிப்பட்ட சுதந்திரத்திற்கு இச்சட்டம் எவ்விதத்திலும் தடையாக இருக்காது எனவும், அரசியல் இலாபங்களுக்காகப் பொய்களைப் பரப்புவதை விடுத்து ஜனநாயக வழிகளில் இச்சட்டத்தை அணுகுமாறும் நீதியமைச்சர் கேட்டுக்கொண்டுள்ளார்.