சுவிட்சர்லாந்தில் எரிபொருள் விநியோகம் மீண்டும் சீரானது

நியூஷாட்டல் மாகாணத்தின் க்ரெசியே பகுதியில் உள்ள எண்ணெய் சுத்திகரிப்பு நிலையம் மீண்டும் செயல்படத் தொடங்கியதைத் தொடர்ந்து, வழக்கமான விநியோக வழிகள் மூலம் எரிபொருள் கிடைப்பது உறுதி செய்யப்பட்டுள்ளதாக சுவிட்சர்லாந்து பொருளாதார விநியோகத்துக்கான கூட்டாட்சி அலுவலகம் தெரிவித்துள்ளது.

எண்ணெய் சுத்திகரிப்பு நிலையம் சுமார் இரண்டு வாரங்கள் செயல்படாமல் இருந்ததும், ரைன் நதியில் தொடர்ந்து நிலவி வரும் குறைந்த நீர்மட்டமும் காரணமாக, தற்காலிகமாக எரிபொருள் விநியோகத்தில் பற்றாக்குறை ஏற்பட்டது.

இதையடுத்து, செப்டம்பர் 8 முதல் 20-ஆம் தேதி வரை அவசரகால கையிருப்பில் இருந்து 30 ஆயிரம் கன மீட்டர் டீசலும், 30 ஆயிரம் கன மீட்டர் பெட்ரோலும் வெளியிடப்பட்டன.

பெட்ரோலுக்காக ஒதுக்கப்பட்ட முழு அளவும் பயன்படுத்தப்பட்ட நிலையில், டீசல் கையிருப்பில் சுமார் மூன்றில் இரண்டு பங்கு பயன்படுத்தப்பட்டதாக அதிகாரிகள் தெரிவித்துள்ளனர்.

அவசரகால கையிருப்பில் இருந்து பெறப்பட்ட எரிபொருள் அளவு, அடுத்த ஆறு மாதங்களுக்குள் மீண்டும் நிரப்பப்பட வேண்டும்.

எனினும், சுவிட்சர்லாந்தின் எரிபொருள் விநியோக நிலைமை தொடர்ந்து சற்று நெருக்கடியான நிலையிலேயே இருப்பதாக அதிகாரிகள் தெரிவித்துள்ளனர். ரைன் நதியில் நீர்மட்டம் குறைவாக இருப்பதால், எரிபொருளை கப்பல்கள் மூலம் கொண்டு செல்லும் திறன் தொடர்ந்து பாதிக்கப்பட்டுள்ளது.