புத்தளம் - அநுராதபுரம் வீதியில் கோர பேருந்து விபத்து: இருவர் பலி; 15 பேர் காயம்!

கொழும்பில் இருந்து மன்னார் நோக்கிச் சென்ற அதி சொகுசு பேருந்து ஒன்று, மோட்டார் சைக்கிளை முந்திச் செல்ல முயன்றபோது கட்டுப்பாட்டை இழந்து வீதியோரத்தில் இருந்த பாலத்தில் மோதியுள்ளது. தொடர்ந்து வீதியை விட்டு விலகிச் சென்ற பேருந்து, அதி உயர் அழுத்த மின் கம்பத்துடன் மோதி கவிழ்ந்து விபத்துக்குள்ளானது.

இந்த விபத்தில் மோட்டார் சைக்கிளில் பயணித்த நபரும், பேருந்தில் பயணித்த பெண் ஒருவரும் சம்பவ இடத்திலேயே உயிரிழந்துள்ளனர். படுகாயமடைந்த பேருந்தின் சாரதி உட்பட 15க்கும் மேற்பட்டோர் மீட்கப்பட்டு வைத்தியசாலையில் அனுமதிக்கப்பட்டுள்ளனர். சாரதியின் நிலைமை கவலைக்கிடமாக இருப்பதாக பொலிஸார் தெரிவித்துள்ளனர்.

மின் கம்பம் சேதமடைந்ததால் அப்பகுதியில் மின் விநியோகம் தடைப்பட்டுள்ளது. சம்பவம் தொடர்பில் சாலியவெவ பொலிஸார் மேலதிக விசாரணைகளை மேற்கொண்டு வருகின்றனர்.