அமெரிக்காவில் குடிவரவு நடவடிக்கைகளுக்கு ரோபோ நாய்களை பயன்படுத்த ICE திட்டம்

இதற்காக Boston Dynamics நிறுவனத்திடமிருந்து நாய் போன்ற ரோபோக்களை வாங்க, இரண்டு மில்லியன் அமெரிக்க டாலர்கள் வரை செலவிட ICE திட்டமிட்டுள்ளதாக ஒப்பந்த ஆவணங்கள் தெரிவிக்கின்றன.

இந்த ரிமோட் மூலம் இயக்கப்படும் ரோபோக்கள், குறிப்பாக அபாயகரமான, நிலையற்ற அல்லது மனிதர்கள் செல்வதற்கு கடினமான இடங்களில் சூழ்நிலையை மதிப்பிடவும், சாத்தியமான ஆபத்துகளை ஆய்வு செய்யவும் பயன்படுத்தப்படவுள்ளன.

இந்த ஒப்பந்தம் இந்த ஆண்டு இறுதிக்குள் Boston Dynamics நிறுவனத்திற்கு வழங்கப்படும் என எதிர்பார்க்கப்படுகிறது.

எனினும், இந்த ரோபோ நாய்களுக்கு தாக்குதல் நடத்தும் திறன் வழங்கப்படுமா என்பது குறித்து இதுவரை எந்த தகவலும் வெளியாகவில்லை.

அமெரிக்க அதிபர் Donald Trump-ன் கடுமையான குடியேற்றக் கொள்கையை அமல்படுத்துவதில் ICE முக்கிய பங்கு வகித்து வருகிறது. சமீபத்திய காலங்களில் ICE மேற்கொண்ட நடவடிக்கைகள் தொடர்பாக பல்வேறு விமர்சனங்களும் எழுந்துள்ளன.

மேலும், மின்சார அதிர்ச்சி கையுறைகள் உள்ளிட்ட புதிய உபகரணங்களை வாங்கும் திட்டத்தாலும் அந்த அமைப்பு சர்ச்சையை எதிர்கொண்டுள்ளது.

இதேவேளை, நான்கு கால்களில் இயங்கும் ரோபோக்களை பாதுகாப்பு மற்றும் அவசரகால நடவடிக்கைகளில் பயன்படுத்துவது புதிதல்ல. Boston Dynamics நிறுவனத்தின் ரோபோ நாய்கள் Hamburg துறைமுகத்தில் பாலங்களின் பாதுகாப்பை ஆய்வு செய்வதற்காக ஏற்கனவே பயன்படுத்தப்பட்டு வருகின்றன.

வெடிகுண்டு மிரட்டல்கள் உள்ளிட்ட மனிதர்களுக்கு ஆபத்தான சூழ்நிலைகளிலும் இதுபோன்ற ரோபோக்கள் பயன்படுத்தப்படலாம் என தெரிவிக்கப்பட்டுள்ளது.