நாட்டில் டெங்கு பரவல் தீவிரமடைவு: 28 சுகாதாரப் பிரிவுகள் அதிஅபாய வலயங்களாக அறிவிப்பு!

இந்த ஆண்டில் இதுவரை பதிவாகியுள்ள மொத்த டெங்கு நோயாளர்களின் எண்ணிக்கை 1,05,097 ஆக உயர்ந்துள்ளதுடன், உயிரிழந்தவர்களின் எண்ணிக்கை 79 ஆக அதிகரித்துள்ளது.

பதிவான மொத்த நோயாளர்களில் 52 சதவீதத்திற்கும் அதிகமானோர் மேல் மாகாணத்திலேயே பதிவாகியுள்ளனர். இதன்படி மேல் மாகாணத்தில் 54,673 நோயாளர்கள் அடையாளம் காணப்பட்டுள்ளனர்.

மாவட்ட ரீதியில் கம்பஹா மாவட்டத்தில் அதிகபட்சமாக 22,053 நோயாளர்களும், கொழும்பு மாவட்டத்தில் 20,384 நோயாளர்களும் பதிவாகியுள்ளனர். மேலும் கண்டி மாவட்டத்தில் 8,378 நோயாளர்களும், களுத்துறை மாவட்டத்தில் 6,592 நோயாளர்களும் இனங்காணப்பட்டுள்ளனர்.

ஒக்டோபர் மாதத்தின் கடந்த 25 நாட்களில் மட்டும் 4,377 டெங்கு நோயாளர்கள் பதிவாகியுள்ளதாகச் சுட்டிக்காட்டியுள்ள தேசிய டெங்கு ஒழிப்புப் பிரிவு, பொதுமக்கள் தங்கள் சூழலைத் தூய்மையாக வைத்துக்கொண்டு கொசுக்கள் பெருகும் இடங்களை ஒழிக்குமாறு கேட்டுக்கொண்டுள்ளது.