ஈரானியக் கப்பல்கள் விவகாரம்: இலங்கைக்கு அமெரிக்கா அழுத்தம் தரவில்லை – அமைச்சர் விஜித ஹேரத் தெளிவு!

இலங்கை கடற்பரப்பிற்கு அருகில் நிறுத்தப்பட்டுள்ள ஈரானியக் கப்பல்கள் குறித்து இன்று (4) விளக்கமளித்த அமைச்சர், "சர்வதேசக் கடற்பரப்பில் உள்ள 47 கப்பல்களில் 19 ஈரானியக் கப்பல்கள் அடங்கும். அவை இலங்கை எல்லைக்குள் வரவில்லை; நீண்டகாலமாகவே சர்வதேசக் கடற்பகுதியில் நிறுத்தப்பட்டுள்ளன" என்றார். ஹோர்முஸ் நீரிணை நெருக்கடி காரணமாக மலேசியா, இந்தோனேசியா போன்ற நாடுகளுக்கு அருகிலும் இவ்வாறான கப்பல்கள் உள்ளதாகச் சுட்டிக்காட்டினார்.

ஈரானியக் கப்பல்களுக்கு உணவு, நீர் வழங்குவதைத் தடுக்குமாறு அமெரிக்கா அறிவித்ததாக வெளியாகும் செய்திகள் முற்றிலும் உண்மைக்கு புறம்பானவை என்று மறுத்த அவர், இலங்கை மீது எவ்வித அமெரிக்க அழுத்தமும் இல்லை என்றும் தெளிவுபடுத்தினார்.

மேலும், திருகோணமலைத் துறைமுகத்தில் உள்ள 'IRIS Bushehr' கப்பலில் உள்ள 13 பணியாளர்களுக்கு மனிதநேய அடிப்படையில் உணவும் பாதுகாப்பும் வழங்கப்பட்டு வருகிறது. அதேவேளை, அமெரிக்கத் தடையிலுள்ள கப்பல்களுக்கு எவ்விதப் பொருட்களையும் இலங்கை விநியோகிக்கவில்லை என்றும், சர்வதேசக் கடல்சார் சட்டங்களுக்கு உட்பட்டே இலங்கை அரசு இயங்குகிறது என்றும் அமைச்சர் வலியுறுத்தினார்.