சுவிற்சர்லாந்தில் பன்றிகளுக்கு நுரையீரல் நோய் – 1,500 பன்றிகள் அழிப்பு

“என்சூட்டிக் நிமோனியா” எனப்படும் இந்த நோய், பெர்ன், லூசெர்ன், சோலோதுர்ன், ஸ்விட்ஸ், துர்காவ் மற்றும் வோ ஆகிய ஆறு மாகாணங்களில் உள்ள 20 இனப்பெருக்கப் பண்ணைகளை பாதித்துள்ளது.

மேலும், 14 மாகாணங்களில் உள்ள 40 பன்றி வளர்ப்புப் பண்ணைகளிலும் நோய் பாதிப்பு இருக்கலாம் என தெரிவிக்கப்பட்டுள்ளது.

மிகவும் பாதிக்கப்பட்டுள்ள லூசெர்ன் மாகாணத்தில் மட்டும் 11 இனப்பெருக்கப் பண்ணைகளில் நோய்க்கிருமி கண்டறியப்பட்டுள்ளது. அந்த மாகாணத்தில் சுமார் 4 லட்சம் பன்றிகள் உள்ளன.

நோய் பரவலைத் தடுக்க, பாதிக்கப்பட்ட பண்ணைகளில் உள்ள பன்றிகளை, முடிந்தவரை இறைச்சிக்காக அறுக்க அதிகாரிகள் உத்தரவிட்டுள்ளனர். அவ்வாறு செய்ய முடியாத பன்றிகள், விலங்குகள் நல விதிமுறைகளுக்கு உட்பட்டு கொல்லப்படும்.

பாதிக்கப்பட்ட பண்ணைகளை முழுமையாக காலி செய்யும் நடவடிக்கை அக்டோபர் 2-ஆம் தேதிக்குள் முடிக்க திட்டமிடப்பட்டுள்ளது. அதன்பிறகு பன்றிக் கொட்டகைகள் முழுமையாக சுத்தம் செய்யப்பட்டு கிருமிநாசினி மூலம் தூய்மைப்படுத்தப்படும்.

மேலும், பாதிக்கப்பட்ட 40 பன்றி வளர்ப்புப் பண்ணைகளில் கால்நடைகளை இடமாற்றம் செய்வதற்குத் தற்காலிக தடை விதிக்கப்பட்டுள்ளது. இதன் மூலம் நோய் மற்ற பண்ணைகளுக்கு பரவுவதைத் தடுக்க நடவடிக்கை எடுக்கப்பட்டுள்ளது.

இந்த நோய் மனிதர்களுக்கு ஆபத்தானது அல்ல என சுவிட்சர்லாந்தின் உணவுப் பாதுகாப்பு மற்றும் கால்நடை மருத்துவ அலுவலகம் தெரிவித்துள்ளது. சுவிட்சர்லாந்து கடந்த 1996 முதல் 2004 வரை மேற்கொண்ட நடவடிக்கைகளுக்குப் பிறகு, இந்த கால்நடை நோயிலிருந்து பெருமளவில் விடுபட்ட நாடாகக் கருதப்பட்டு வந்தது.