மோன் பிளாங்க் மலையின் உயரம் அதிகரிப்பு – புதிய அளவீட்டில் 4,807.47 மீட்டர்!

பிரான்சின் ஹோட்-சவோயில் உள்ள சான்றளிக்கப்பட்ட நில அளவையாளர் அமைப்பு நேற்று வெளியிட்ட அறிவிப்பின்படி, 2023ஆம் ஆண்டு செப்டம்பரில் மேற்கொள்ளப்பட்ட அளவீட்டுடன் ஒப்பிடும்போது மலையின் உயரம் 1.88 மீட்டர் அதிகரித்துள்ளது.

2023ஆம் ஆண்டு மேற்கொள்ளப்பட்ட அளவீட்டில், மோன் பிளாங்கின் உயரம் 4,805.59 மீட்டராக இருந்தது. அப்போது மலையின் உயரம் குறைந்திருப்பது கவலையை ஏற்படுத்தியது. இருப்பினும், காற்றின் வேகம், பனிப்பொழிவு மற்றும் வெப்பநிலை மாற்றங்கள் காரணமாக மலையின் உச்சிப்பகுதி உயரத்தில் பருவகாலத்திற்கு ஏற்ப ஒரு மீட்டருக்கும் அதிகமான வேறுபாடுகள் ஏற்படக்கூடும் எனத் தெரிவிக்கப்பட்டுள்ளது.

இந்த ஆண்டு மேற்கொள்ளப்பட்ட ஆய்வில், மலையின் உச்சியில் உள்ள பனிக்கவசத்தின் தடிமன் மற்றும் அப்பகுதியின் ஈர்ப்பு விசைப் புலம் ஆகியவையும் அளவிடப்பட்டுள்ளன. காலநிலை மாற்றத்தின் தாக்கத்தால் ஆல்ப்ஸ் மலைத்தொடரின் மிக உயரமான சிகரத்தில் ஏற்படும் மாற்றங்களைத் தொடர்ந்து கண்காணிப்பதே இந்த ஆய்வுகளின் நோக்கமாகும்.