தபால் பார்சல் கட்டணங்களை ஒரே மாதிரியாக்கும் முன்மொழிவை தேசிய மன்றம் நிராகரிப்பு

இந்த விவகாரம் தொடர்பான தீர்மானம் புதன்கிழமை தேசிய மன்றத்தில் வாக்கெடுப்புக்கு வந்த நிலையில், பெரும்பான்மையால் நிராகரிக்கப்பட்டது. இதன் மூலம், தேசிய மன்றத்தின் போக்குவரத்து மற்றும் தொலைத்தொடர்பு குழுவின் பரிந்துரை ஏற்கப்பட்டுள்ளது.

மாநிலங்கள் மன்றம் கடந்த மார்ச் மாதம் இதே தொடர்பான தீர்மானத்தை ஏற்றுக்கொண்டிருந்தது. ஆனால், இரு அவைகளுக்கும் இடையே தற்போது வேறுபட்ட நிலைப்பாடு ஏற்பட்டுள்ளது.

இந்த முன்மொழிவை முன்வைத்த ஃபாபியோ ரெகாஸி, டெமு மற்றும் ஷீன் போன்ற சர்வதேச ஆன்லைன் நிறுவனங்களுடன் ஒப்பிடும்போது, சுவிஸ் சில்லறை விற்பனையாளர்கள் போட்டியில் பாதிக்கப்படுவதாக வாதிட்டிருந்தார். சிறிய பொதிகளுக்கான விதிமுறைகளில் உள்ள வேறுபாடுகளும் இதற்கு ஒரு காரணம் என அவர் குறிப்பிட்டிருந்தார்.

ஆனால், தேசிய மன்றத்தின் தொடர்புடைய குழு, சிறிய பொதிகளுக்கான தபால் கட்டண முறையில் தற்போது மாற்றம் செய்வது, நடைபெற்று வரும் தபால் சட்டத் திருத்தப் பணிகளுடன் முரண்படும் என தெரிவித்துள்ளது.

தகவல் தொடர்புத் துறை அமைச்சர் ஆல்பர்ட் ரோஸ்டி, சுவிஸ் தபால் சேவை தனது அடிப்படை சேவைகளுக்கான கட்டணங்களை செலவுகளை ஈடுசெய்யும் வகையில் நிர்ணயிக்க வேண்டும் என ஏற்கனவே தெரிவித்திருந்தார்.

மேலும், சர்வதேச தபால் சேவைகளுக்கான கட்டணங்களை உலகளாவிய தபால் ஒன்றியம் நிர்ணயிப்பதால், அவற்றில் சுவிஸ் அரசுக்கு நேரடி கட்டுப்பாடு இல்லை என கூட்டாட்சி மன்றம் தெரிவித்துள்ளது.