திபெத்தில் உருவான புதிய ஏரி: மீட்புக் குழுவினர் பாதுகாப்பான இடங்களுக்கு மாற்றம்!

நேபாளம் மற்றும் திபெத் எல்லையில் ஏற்கனவே உருவான தடுப்பு ஏரிக்கு கீழ் பகுதியில் புதிய செயற்கை ஏரி ஒன்று உருவாகியுள்ளதாகச் சீன அரசு ஊடகங்கள் தெரிவித்துள்ளன.

திடீர் வெள்ளப்பெருக்கின் போது ஏற்பட்ட இடிபாடுகள் ஆற்று நீரை மறித்ததால் ஏற்கனவே ஒரு தடுப்பு ஏரி உருவாகியிருந்தது. அது உடைந்து வெள்ளப்பெருக்கு ஏற்படுவதைத் தடுக்க இயற்கையான முறையில் நீர் வடிய ஏற்பாடுகள் செய்யப்பட்டு வந்த நிலையில், தற்சமயம் மீண்டும் ஒரு மண்சரிவு ஏற்பட்டுள்ளது.

சீன மத்திய தொலைக்காட்சி தகவலின்படி, கண்காணிப்பு ட்ரோன் மூலம் சனிக்கிழமை ஆய்வு செய்தபோதே இந்த புதிய மண்சரிவு கண்டறியப்பட்டது.

புருக்பு சியாங் சாங்பு ஆற்றில் ஏற்கனவே இருந்த தடுப்பு ஏரியிலிருந்து சுமார் 2.8 கிலோமீற்றர் (1.7 மைல்) கீழ்நோக்கிய பகுதியில் இந்த நிலச்சரிவு ஏற்பட்டு, பாறைகளும் இடிபாடுகளும் நீரை மறித்துப் புதிய ஏரியை உருவாக்கியுள்ளன.

மண்சரிவைத் தொடர்ந்து சீனாவின் அவசரகால முகாமைத்துவ அமைச்சு உடனடியாகப் பகுதிக்கு நிபுணர்களை அனுப்பி நிலைமையை மதிப்பீடு செய்து வருவதாக தெரிவிக்கப்படுகிறது.