சுவிட்சர்லாந்தில் சோலார் மின்சாரத்திற்கான புதிய விலை முறை

வீடுகளில் உற்பத்தி செய்யப்பட்டு மின்வலையமைப்புக்கு மீண்டும் வழங்கப்படும் உபரி மின்சாரத்திற்கான தொகை, இதுவரை உள்ளூர் மின்விநியோக நிறுவனங்களால் காலாண்டுக்கு ஒருமுறை நிர்ணயிக்கப்பட்டு வந்தது.

ஆனால் புதிய முறையில், மின்சார சந்தையின் நிலவரத்துக்கு ஏற்ப இந்த விலை ஒவ்வொரு 15 நிமிடங்களுக்கும் மாறும்.

குறிப்பாக வெயில் அதிகமாக இருக்கும் வார இறுதி நாட்களில் மின்வலையமைப்பில் மின்சாரம் அதிகமாக சேரும் நிலை ஏற்பட்டால், உபரி மின்சாரத்தின் விலை தற்காலிகமாக எதிர்மறையாக மாறக்கூடும். அதாவது, உற்பத்தியாளர்கள் தாங்கள் வழங்கும் மின்சாரத்தை மின்வலையமைப்பில் சேர்ப்பதற்கே பணம் செலுத்த வேண்டிய சூழல் உருவாகலாம்.

எனினும், 30 கிலோவாட்டுக்கும் குறைவான திறன் கொண்ட சிறிய வீட்டு சோலார் அமைப்புகளுக்கு ஒரு கிலோவாட் மணிநேரத்திற்கு குறைந்தபட்சம் 6 சென்டிம்ஸ் வழங்கப்பட வேண்டும் என சுவிஸ் நாடாளுமன்றம் நிர்ணயித்துள்ளது.

இதனால், பெரும்பாலான வீட்டு சோலார் மின்சார உற்பத்தியாளர்கள் ஆண்டின் மொத்த கணக்கில் தொடர்ந்து பயனடைவார்கள் என எதிர்பார்க்கப்படுகிறது.

ரோமான்டி பிராந்தியத்தில், Romande Energie மற்றும் Groupe E நிறுவனங்கள் 2027ஆம் ஆண்டு முதல் புதிய முறையை இயல்புநிலை முறையாக அமல்படுத்துகின்றன. அதேவேளை, SIG மற்றும் VITEOS நிறுவனங்கள் நிலையான கட்டண முறையைத் தொடர்ந்து பயன்படுத்தவுள்ளன.