சுற்றுலாப் பயணிகளுக்கு அறிவித்தல்: யால தேசிய வனத்தின் 2 வளாகங்கள் தற்காலிகமாக மூடல்!

இலங்கையின் முன்னணி சுற்றுலாத் தலங்களில் ஒன்றான யால தேசிய வனவிலங்கு பூங்காவின் 1 மற்றும் 2 ஆம் வளாகங்கள் எதிர்வரும் செப்டம்பர் மாதம் 14 ஆம் திகதி முதல் தற்காலிகமாக மூடப்படவுள்ளதாக வனஜீவராசிகள் திணைக்களம் அறிவித்துள்ளது.

யால தேசிய வனவிலங்கு பூங்காவில் நிலவி வரும் வறட்சியான காலநிலை காரணமாக வனவிலங்குகளைப் பாதுகாக்கவும், பூங்காவின் இயற்கைச் சூழலைச் சீரமைக்கவும் இந்த நடவடிக்கை எடுக்கப்பட்டுள்ளது.

இதன்படி, எதிர்வரும் செப்டம்பர் 14 ஆம் திகதி முதல் ஒக்டோபர் 15 ஆம் திகதி வரை ஒரு மாத காலத்திற்கு 1 மற்றும் 2 ஆம் வளாகங்கள் பார்வையாளர்களுக்காக முழுமையாக மூடப்படும் என அறிவிக்கப்பட்டுள்ளது.

வறட்சி தீவிரமடையும் காலத்தில் வனவிலங்குகள் நீர்நிலைகளைத் தேடிச் செல்வதோடு, சுற்றுலாப் பயணிகளின் வாகனப் போக்குவரத்தால் விலங்குகளுக்கு ஏற்படும் இடையூறுகளைத் தவிர்ப்பதற்காக வனஜீவராசிகள் திணைக்களம் ஆண்டுதோறும் இந்த நடவடிக்கையை மேற்கொண்டு வருகிறது.

எனினும், இக்காலகட்டத்தில் ஏனைய பகுதிகளைப் பார்வையிட விரும்பும் உள்நாட்டு மற்றும் வெளிநாட்டுச் சுற்றுலாப் பயணிகள் மாற்று ஏற்பாடுகளைப் பயன்படுத்துமாறு அதிகாரிகள் கேட்டுக்கொண்டுள்ளனர்.