மூன்றாவது குழந்தை பெற்றுக்கொள்ளும் அரச பெண் ஊழியர்களுக்கும் ஓராண்டு மகப்பேறு விடுப்பு – விஜயின் தமிழக அரசு அறிவிப்பு!

தமிழக அரசின் தற்போதைய நடைமுறையின்படி, முதல் மற்றும் இரண்டாவது குழந்தைகளைப் பெற்றுக்கொள்ளும் அரசு பெண் ஊழியர்களுக்கு தலா 365 நாட்கள் முழு சம்பளத்துடன் கூடிய மகப்பேறு விடுப்பு வழங்கப்பட்டு வருகிறது. அதேவேளை, இரண்டு அல்லது அதற்கு மேற்பட்ட உயிருடன் உள்ள குழந்தைகளைக் கொண்ட பெண் ஊழியர்களுக்கு மூன்றாவது குழந்தைக்கு 12 வாரங்கள் மட்டுமே மகப்பேறு விடுப்பு வழங்கப்பட்டு வந்தது.

இந்த நிலையில், மூன்றாவது குழந்தையைப் பெற்றுக்கொள்ளும் அரசு பெண் ஊழியர்களுக்கும் 365 நாட்கள் மகப்பேறு விடுப்பு வழங்கும் புதிய முடிவை தமிழக அரசு அறிவித்துள்ளது.

தமிழகத்தில் அரசு பெண் ஊழியர்களுக்கான மகப்பேறு விடுப்பு கடந்த காலங்களில் படிப்படியாக அதிகரிக்கப்பட்டுள்ளது. 2011 ஆம் ஆண்டு 90 நாட்களில் இருந்து ஆறு மாதங்களாகவும், 2016ஆம் ஆண்டு ஒன்பது மாதங்களாகவும், 2021ஆம் ஆண்டு 365 நாட்களாகவும் மகப்பேறு விடுப்பு அதிகரிக்கப்பட்டிருந்தது.

தற்போது மூன்றாவது குழந்தைக்கும் ஓராண்டு விடுப்பு வழங்கும் அறிவிப்பு வெளியாகியுள்ள நிலையில், அதனை நடைமுறைப்படுத்துவதற்கான விரிவான அரசாணை விரைவில் வெளியிடப்படும் என இந்திய ஊடகங்கள் தெரிவிக்கின்றன.

இதனிடையே, பணிபுரியும் தாய்மார்களுக்கு வழங்கப்படும் ஆதரவு தொடர்பான விவாதங்கள் தமிழகத்தில் கவனம் பெற்றுள்ள நிலையில் இந்த அறிவிப்பு வெளியாகியுள்ளது. சட்டசபை கூட்டத்தொடரின்போது தமிழக வெற்றிக் கழக சட்டமன்ற உறுப்பினர் ஆர். பல்லவி தனது பிறந்த குழந்தையுடன் சட்டசபைக்கு வந்திருந்த சம்பவமும் இதுதொடர்பான விவாதத்தை ஏற்படுத்தியிருந்தது.