தொலைபேசி மோசடி – முதியவர் 2.5 லட்சம் பிராங்குகளை இழப்பு

85 வயதான முதியவர் ஒருவர் வங்கி ஊழியர்கள் எனக் கூறிக்கொண்ட மோசடியாளர்களிடம் சுமார் 2 லட்சத்து 50 ஆயிரம் சுவிஸ் பிராங்குகளை இழந்துள்ளார்.

அவரது பணம் பாதுகாப்பாக இல்லை என தொலைபேசியில் நம்பவைத்த மோசடியாளர்கள், வங்கியில் இருந்து பல தவணைகளாக பெரும் தொகையை எடுக்குமாறு அவரை வற்புறுத்தியுள்ளனர். பின்னர் அந்தப் பணத்தை பல்வேறு இடங்களில் அவர் ஒப்படைத்ததாக காவல்துறை தெரிவித்துள்ளது.

விசாரணையின் போது, அந்த முதியவரிடம் மீண்டும் பணம் பெற முயன்றபோது, வில் நகரில் பணத்தைப் பெற வந்த 21 வயதான உக்ரேனிய இளைஞர் ஒருவர் கைது செய்யப்பட்டார்.

மற்றொரு சம்பவத்தில், 81 வயதான பெண் ஒருவரிடம் இருந்து 10 ஆயிரம் பிராங்குகளைப் பெற முயன்ற 22 மற்றும் 23 வயதான இரண்டு பிரெஞ்சு நாட்டவர்கள் கைது செய்யப்பட்டுள்ளனர்.

மேலும், வங்கிப் பாதுகாப்பு ஊழியர் எனக் கூறிக்கொண்டு 55 வயதான பெண்ணிடம் இருந்து 20 ஆயிரம் பிராங்குகளைப் பெற முயன்ற 20 வயதான உக்ரேனிய இளைஞரும் கைது செய்யப்பட்டுள்ளார்.

ஆகஸ்ட் மாத தொடக்கத்திலிருந்து செயின்ட் கேலன் மாகாணத்தில் மட்டும் ஒன்பது தொலைபேசி மோசடி வழக்குகள் பதிவாகியுள்ளன. இதில் மொத்தமாக சுமார் 7 லட்சத்து 50 ஆயிரம் பிராங்குகள் மோசடி செய்யப்பட்டிருக்கலாம் என காவல்துறை மதிப்பிட்டுள்ளது.

சந்தேகத்திற்கிடமான தொலைபேசி அழைப்புகள் வந்தால் பணத்தையோ மதிப்புமிக்க பொருட்களையோ ஒப்படைக்க வேண்டாம் என்றும், ஏற்கனவே பணம் கொடுத்திருந்தால் உடனடியாக காவல்துறையைத் தொடர்புகொள்ளுமாறும் அதிகாரிகள் அறிவுறுத்தியுள்ளனர்.