பிரிக்ஸ் மாநாட்டில் பங்கேற்க புடின் இந்தியா வருகை: முன்னெச்சரிக்கை நடவடிக்கையாக 3 ரஷிய ராணுவ விமானங்கள் டெல்லி வருகை!

இந்தியாவில் நடைபெறவுள்ள பிரிக்ஸ் (BRICS) உச்சிமாநாட்டில் பங்கேற்பதற்காக ரஷிய அதிபர் விளாடிமிர் புடின் விரைவில் இந்தியா வரவுள்ள நிலையில், அவரது பாதுகாப்பு மற்றும் முன்னெச்சரிக்கை நடவடிக்கைகளுக்காக 3 ரஷிய ராணுவ விமானங்கள் டெல்லி வந்து சேர்ந்துள்ளன.

ரஷிய அதிபரின் வருகையை முன்னிட்டு, அவரது அதிகாரப்பூர்வ சொகுசு காரான 'ஆரஸ் செனட்', சிறப்புப் பாதுகாப்பு உபகரணங்கள் மற்றும் அதிநவீனத் தொடர்பாடல் சாதனங்களை ஏற்றி வந்த பிரம்மாண்ட 'இல்யூஷின்-76' ரஷிய ராணுவ சரக்கு விமானங்கள் டெல்லி இந்திரா காந்தி சர்வதேச விமான நிலையத்தில் தரையிறங்கின.

ரஷிய அதிபரின் தனிப்பட்ட பாதுகாப்புப் படையினர் ஏற்கனவே டெல்லி வந்து சேர்ந்து, இந்தியப் பாதுகாப்பு அதிகாரிகளுடன் இணைந்து மாநாடு நடைபெறும் வளாகம் மற்றும் அதிபர் தங்கும் விடுதிகளில் விரிவான பாதுகாப்பு ஆய்வுகளை மேற்கொண்டு வருகின்றனர்.

உக்ரைன் - ரஷிய போருக்குப் பிறகு அதிபர் புதின் மேற்கொள்ளும் மிக முக்கிய சர்வதேசப் பயணங்களில் ஒன்றாக இது பார்க்கப்படுகிறது. இம்மாநாட்டின் போது இந்தியப் பிரதமர் நரேந்திர மோடியுடன் இருதரப்பு உறவுகள் மற்றும் வர்த்தக ஒப்பந்தங்கள் குறித்து புதின் பேச்சுவார்த்தை நடத்தவுள்ளார்.

ரஷிய அதிபரின் வருகையை முன்னிட்டுத் தலைநகர் டெல்லியில் 5 அடுக்கு வான்வழி மற்றும் நிலப்பரப்புப் பாதுகாப்பு பலப்படுத்தப்பட்டுள்ளது.