சுவிஸ் பதப்படுத்தப்படாத பாலில் ரப்பர் இரசாயனங்கள்

லோசான் கூட்டாட்சி தொழில்நுட்பக் கல்லூரியான EPFL தலைமையிலான ஆய்வில், 17 சுவிஸ் பண்ணைகளில் இருந்து பெறப்பட்ட பால் மாதிரிகள் பரிசோதிக்கப்பட்டன.

அவற்றில் ஏழு மாதிரிகளில் குறைந்தது ஒரு வகையான ரப்பர் இரசாயனம் கண்டறியப்பட்டுள்ளது. அதேவேளை, பரபரப்பான சாலைகளிலிருந்து தொலைவில் அமைந்துள்ள மலைப்பகுதி பண்ணைகளில் பெறப்பட்ட மூன்று மாதிரிகளில் இந்த இரசாயனங்கள் எதுவும் கண்டறியப்படவில்லை.

இந்த இரசாயனங்கள் மனிதர்களின் உடல்நலத்தில் ஏற்படுத்தக்கூடிய தாக்கம் குறித்து தற்போது தெளிவான தகவல்கள் இல்லை என ஆய்வாளர்கள் தெரிவித்துள்ளனர். இருப்பினும், பாலில் கண்டறியப்பட்ட அளவுகள் பொதுவாக குறைவாகவே இருந்ததாக கூறப்பட்டுள்ளது.

ஆய்வாளர்களை ஆச்சரியப்படுத்திய முக்கிய விடயம், மாசுபாட்டுக்கான சாத்தியமான ஆதாரம் பால் கறக்கும் உபகரணங்களாக இருக்கலாம் என்பதாகும்.

பால் கறக்கப் பயன்படுத்தப்படும் குழாய்கள், சீல்கள் மற்றும் பிற ரப்பர் பாகங்களை ஆய்வு செய்தபோது 14 வகையான இரசாயனங்கள் கண்டறியப்பட்டுள்ளன.

அவற்றில் 6PPD-குயினோன் என்ற இரசாயனமும் அடங்குகிறது. இது சில மீன் இனங்களுக்கு தீங்கு விளைவிப்பதாக ஏற்கனவே அறியப்பட்டுள்ளது.

மேலும், வாகனங்களின் டயர்கள் மற்றும் சாலை மேற்பரப்புகள் தேய்வதன் மூலம் உருவாகும் ரப்பர் துகள்களும் விவசாய நிலங்களுக்குச் சென்று, உணவுச் சங்கிலிக்குள் நுழையக்கூடும் என ஆய்வாளர்கள் தெரிவித்துள்ளனர்.

இந்த இரசாயனங்கள் பாலுக்குள் எவ்வாறு செல்கின்றன என்பதையும், ஆண்டு முழுவதும் அவற்றின் அளவு எவ்வாறு மாறுகிறது என்பதையும் கண்டறிய மேலதிக ஆய்வுகள் மேற்கொள்ளப்படவுள்ளன.

இந்த ஆய்வில் EPFL, உணவுப் பாதுகாப்பு மற்றும் கால்நடை விவகாரங்களுக்கான கூட்டாட்சி அலுவலகம் மற்றும் அக்ரோஸ்கோப் ஆராய்ச்சி நிறுவனம் ஆகியவை இணைந்து செயல்பட்டுள்ளன.