டெல்லி விமான நிலையத்தில் பாதுகாப்பு விதிமீறல்: கட்டாயப் பரிசோதனையைத் தவிர்த்து ஜெர்மனிக்குத் தப்பிய பயணிகள்!

அமிர்தசரஸிலிருந்து டெல்லி வழியாக முனிச் செல்லவிருந்த பயணிகள், குடிவரவு அதிகாரிகளின் சோதனையைத் தாண்டிச் சர்வதேச விமானத்தில் ஏறியுள்ளனர். இந்தத் தீவிர பாதுகாப்பு வீழ்ச்சி குறித்து இந்தியச் சிவில் விமானப் போக்குவரத்து அமைச்சகம் மற்றும் உள்துறை அமைச்சகம் ஆகியவை விசாரணையைத் தீவிரப்படுத்தியுள்ளன.

அமிர்தசரஸிலிருந்து ஏர் இந்தியா AI-1115 விமானம் மூலம் டெல்லி வந்தடைந்த மூன்று பயணிகள், அங்கிருந்து லுஃப்தான்சா (Lufthansa LH-763) இணைப்பு விமானம் மூலம் ஜெர்மனியின் முனிச் நகருக்குப் புறப்பட்டுச் சென்றுள்ளனர்.

டெல்லி விமான நிலையத்தில் அவர்கள் உள்நாட்டு வருகைப் பகுதியில் வெளியேறி, சர்வதேசப் புறப்பாடு பகுதியில் உள்ள குடிவரவுச் சோதனைகளை (Immigration Checks) முடித்த பின்னரே விமானத்தில் ஏற்றப்பட்டிருக்க வேண்டும் என தெரிவிக்கப்பட்டுள்ளது.