சுவிட்சர்லாந்தில் அதிர்ச்சித் தகவல்: ஆண்டுதோறும் 4,000 பேர் இரத்த நச்சுத்தன்மையால் உயிரிழப்பு!

உடலில் ஏற்படும் கிருமித்தொற்று (Infection) தீவிரமடைந்து, உடலின் நோய் எதிர்ப்பு மண்டலமே சொந்த உறுப்புகளைப் பாதிக்கும் நிலையே ‘செப்சிஸ்’ எனப்படும் இரத்த நச்சுத்தன்மையாகும். சுவிட்சர்லாந்தில் ஆண்டுக்குக் குறைந்தபட்சம் 20,000 பேர் வரை இந்த பாதிப்பிற்கு ஆளாகின்றனர். இதில் ஐந்தில் ஒருவர் உயிரிழப்பதாக சுகாதாரத்துறை புள்ளிவிவரங்கள் சுட்டிக்காட்டுகின்றன.

இதய அடைப்பு அல்லது புற்றுநோயைப் போலவே இதுவும் ஒரு கடுமையான உயிராபத்தை விளைவிக்கும் நோயாக உள்ளபோதிலும், பொதுமக்களிடையே இதுகுறித்த விழிப்புணர்வு மிகவும் குறைவாகவே உள்ளது என மருத்துவ வல்லுநர்கள் கவலை தெரிவித்துள்ளனர். ஆரம்ப கட்டத்திலேயே இதனைக் கண்டறிந்து தகுந்த சிகிச்சை அளிக்காவிட்டால், உறுப்புகள் செயலிழப்பு ஏற்பட்டு சில மணி நேரங்களிலேயே உயிரிழப்பு நிகழக்கூடும்.

குறிப்பாக முதியவர்கள், குழந்தைகள் மற்றும் நோய் எதிர்ப்பு சக்தி குறைந்தவர்கள் இதனால் அதிகம் பாதிக்கப்படுகின்றனர். எனவே, காய்ச்சல், திடீர் குழப்ப நிலை, மூச்சுத்திணறல் மற்றும் கடுமையான தசை வலி போன்ற அறிகுறிகள் தென்பட்டால் உடனடியாக மருத்துவ உதவியை நாடுமாறு சுவிஸ் சுகாதார அதிகாரிகள் அறிவுறுத்தியுள்ளனர்.