எட்டாவது மாதமாகவும் வருவாய் இலக்கை விஞ்சி இலங்கை சுங்கத் திணைக்களம் சாதனை!

இலங்கை சுங்கத் திணைக்களம் தொடர்ந்து எட்டாவது மாதமாகவும் தனது மாதாந்த வருவாய் இலக்கை விஞ்சி அபார சாதனை படைத்துள்ளது. 

இலங்கை சுங்கத் திணைக்களம் நடப்பு 2026 ஆம் ஆண்டிற்கான மாதாந்த வருவாய் இலக்குகளைத் தொடர்ச்சியாக எட்டி சாதனை படைத்து வருகிறது. அந்த வகையில், ஓகஸ்ட் மாதத்திற்கான வருவாய் இலக்கான 190.3 பில்லியன் ரூபாயை மாதத்தின் இறுதிக்கு முன்னதாகவே கடந்து திணைக்களம் புதிய மைல்கல்லை எட்டியுள்ளது.  

ஓகஸ்ட் 27 ஆம் திகதி வரையிலான தரவுகளின்படி, சுங்கத் திணைக்களம் 199.6 பில்லியன் ரூபாய்க்கும் அதிகமான வருவாயை ஈட்டியுள்ளதுடன், ஓகஸ்ட் மாத இறுதியில் இது 200 பில்லியன் ரூபாயைத் தாண்டும் என எதிர்பார்க்கப்படுகிறது.

 2026 ஆம் ஆண்டிற்காக அரசாங்கத்தினால் சுங்கத் திணைக்களத்திற்கு 2,207 பில்லியன் ரூபாய் வருவாய் இலக்காக நிர்ணயிக்கப்பட்டிருந்தது. இருப்பினும், இந்த ஆண்டின் முதல் 8 மாதங்களுக்குள்ளேயே சுங்கத் திணைக்களம் 1,832.7 பில்லியன் ரூபாயை ஈட்டி, வருடாந்த இலக்கில் 83 சதவீதத்தைப் பூர்த்தி செய்துள்ளது குறிப்பிடத்தக்கது.  

இறக்குமதி கட்டுப்பாடுகள் தளர்த்தப்பட்டமை, சுங்க வரி வசூலிப்பில் மேற்கொள்ளப்பட்ட கடுமையான சோதனைகள் மற்றும் முறைகேடுகளைத் தடுப்பதற்கான கண்காணிப்பு நடவடிக்கைகள் பலப்படுத்தப்பட்டமையே இந்த தொடர் வருவாய் அதிகரிப்புக்கு முக்கிய காரணம் என அதிகாரிகளால் சுட்டிக்காட்டப்பட்டுள்ளது.